Fitim Llapashtica pas triumfit ndaj Gjilanit: Kjo skuadër ka karakter dhe i takon elitës

Trajneri i Vushtrrisë, Fitim Llapashtica, ka shprehur vlerësimin maksimal për futbollistët e tij pas triumfit inaugurues të sezonit kundër SC Gjilanit, duke bërë të qartë se grupi zotëron cilësi të lartë dhe se kriza e rezultateve tashmë është lënë pas. Gjatë prononcimit të tij, Llapashtica theksoi se organikën e ekipit e përbëjnë lojtarë me mentalitet fitues, të cilët kanë dhënë kontribut vendimtar edhe në ngjitjen e Vushtrrisë drejt Superligës, duke shtuar se faza e vështirë ka qenë thjesht një moment kalimtar. “Këta lojtarë kanë vlerë. Ka lojtarë kampionë që e kanë kthyer Vushtrrinë në Superligë. Nuk ka qenë momenti i tyre”, deklaroi ai ndër të tjera. Më tej, kreu i stafit teknik tregoj se përgatitjet gjatë gjithë javës janë zhvilluar me intensitet dhe përkushtim maksimal, duke u fokusuar në analizimin e detajuar të kapaciteteve të skuadrës së tij dhe të mangësive të kundërshtarit. “Kemi punuar gjatë javës në të gjitha aspektet, duke tentuar t’i gjejmë pikat tona të forta dhe pikat e dobëta të Gjilanit. Vushtrria e meriton vendin në Superligë. Ngërçi nga loja e sotme veçse është kaluar”, u shpreh trajneri. Vujstrriasit siguruan tri pikët e plota falë realizimit vendimtar të Urim Statovcit në minutën e 58-të të takimit, duke mbyllur përfundimisht serinë e gjatë prej shtatë ndeshjesh pa shijuar fitoren.