Fluks më i ulët udhëtarësh nga Kosova drejt Shqipërisë gjatë fundjavës

Pavarësisht kushteve atmosferike me reshje shiu dhe mot të paqëndrueshëm, pika e kalimit kufitar të Morinit vazhdon të mbetet një ndër arteriet kryesore për hyrjen e qytetarëve nga Kosova në territorin e Shqipërisë. Edhe pse përgjatë kësaj fundjave shënohet një rënie e numrit të vizitorëve dhe udhëtarëve, qarkullimi i automjeteve dhe qytetarëve në të dyja anët e kufirit vijon normalisht. Në ndërkohë, autoritetet bëjnë me dije se deri në përfundim të këtij muaji, procedurat e kalimit në këtë pikë kufitare do të zhvillohen sipas protokolleve standarde të kontrollit. Kujtojmë se gjatë fundjavave dhe ditëve të festave zyrtare, për të gjitha automjetet që mbajnë targa të Shqipërisë dhe të Kosovës, zbatohet një procedurë e përshpejtuar e kalimit, e cila ka për qëllim kryesor lehtësimin e qarkullimit dhe parandalimin e krijimit të kolonave apo pritjeve të gjata në kufi.