Rrëfimi i bujshëm i Quique Setien: Te Barcelona drejtova yje me vlerë 80 milionë euro që s'kuptonin futbollin

Tekniku i njohur, Quique Setien, ka pranuar hapur se periudha e tij në krye të pankinës së Barcelonës mbetet ndër sfidat më të ndërlikuara dhe më të vështira të gjithë karrierës së tij profesionale. Duke folur gjatë një interviste të gjerë për podkastin "El que marca gana", ai evokoi kohën e kaluar në stadiumin "Camp Nou", duke theksuar se nuk arriti kurrë të shfaqte identitetin e tij të vërtetë dhe as të vendoste ato lidhje njerëzore e profesionale që kishte krijuar me sukses në klubet e tjera ku kishte punuar më parë. “Nuk isha vetvetja në Barcelonë, ose ndoshta nuk munda apo nuk dita ta bëja. Kjo është e vërteta. Nuk isha unë, sepse natyra ime është ndryshe. Kisha një qasje të caktuar dhe sot, kur shoh fotografitë e mia nga ajo kohë, pothuajse nuk e njoh veten”, u shpreh ai fillimisht. Setien sqaroi se pavarësisht se si ishte larguar nga Real Betisi mes pakënaqësive dhe thirrjeve për shkarkim, atmosfera e përditshme në dhomën e zhveshjes atje kishte qenë e jashtëzakonshme. Sipas tij, shpërthimi i pandemisë së COVID-19 vetëm sa e rëndoi situatën, duke e bërë të pamundur shijimin e plotë të kësaj përvoje, megjithëse ai mbetet i bindur se nuk u pendua kurrë për pranimin e ofertës katalunase. Gjatë asaj periudhe, ai pati mundësinë t'i shprehte Lionel Messit admirimin e tij të thellë, duke i treguar se si kishte kaluar vite duke pritur ndeshjet e skuadrës vetëm për ta parë në fushë. “Një ditë i thashë Messit: I kam kaluar 14 vite të jetës sime duke pritur me padurim datat e ndeshjeve të Barcelonës, thjesht që të të shikoja duke luajtur”, përfundoi trajneri nga Cantabria. Megjithatë, deklarata më e bujshme e Setien erdhi kur ai trajtoi çështjen e leximit taktik të lojës, duke kritikuar hapur futbollistët që, pavarësisht vlerës së lartë financiare apo talentit të tyre, çedojnë në aspektin e kuptimit të lojës. “Kam drejtuar lojtarë që kushtonin 80 milionë euro dhe nuk e kuptonin futbollin”, tha ai pa hezitim, duke shtuar se kishte punuar në mënyrë individuale me disa prej tyre për t'i ndihmuar të përmirësonin aspektin taktik përmes analizës me video. Setien tregoi se si ulej me futbollistët, u shfaqte pamje nga ndeshjet e tyre dhe i pyeste për vendimet që kishin marrë në fushë. Sipas tij, vetëm përmes këtij ballafaqimi vizual dhe reflektimit të përbashkët mbi mundësitë e humbura apo zgjedhjet alternative, lojtarët mund të ndërgjegjësoheshin dhe të shfaqnin më pas në fushë një pjekuri më të madhe taktike. Edhe pse strategu spanjoll nuk e bëri kurrë publike emrin e lojtarit të Barcelonës që i referohej gjatë këtyre seancave analitike, kritika e tij e fortë ndaj yjeve me kosto të lartë është shndërruar në një nga temat më të komentuara të kësaj interviste.