Nga ekranet e televizionit te kinemaja evropiane: Hande Erçel merr rolin kryesor në filmin e ri 'Diaspora'

Aktorja e njohur turke, Hande Erçel, po bëhet gati për një angazhim të rëndësishëm ndërkombëtar, pasi është përzgjedhur për të mbajtur peshën e rolit kryesor në filmin e metrazhit të gjatë “Diaspora”, i cili vjen me skenar dhe regji të kineastit iranian Nader Saeivar. Skenat e këtij filmi parashikohet të fillojnë të xhirohen në muajt e parë të vitit 2027, ndërsa i gjithë realizimi do të xhirohet në metropolin gjerman, në Berlin. Ngjarjet do të sillen rreth çmimeve të mprehta si migracioni, paragjykimet e ndryshme shoqërore dhe lufta e vazhdueshme për të vendosur drejtësinë larg vendlindjes. Në këtë rrëfim kinematografik, Erçel do t'i jep jetë karakterit të Merves, një grua turke me shkollim dhe nga shtresa e mesme, jeta e së cilës merr një kthesë drastike pas humbjes tragjike të bashkëshortit në Turqi. Për të nisur një kapitull të ri, ajo vendos të shpërngulet në Gjermani së bashku me djalin e saj 12-vjeçar. Merve gjen punë në një qendër gjuhësore, e cila drejtohet nga një familje gjermane që ndodhet në pritje të fëmijës së tyre të dytë. Megjithatë, mundësitë e saj për të ndërtuar një qetësi shpirtërore dhe ekonomike tronditen, kur ajo përballet me veprime të papranueshme nga djali 15-vjeçar i familjes, Luca. Pasi situata përsëritet, Merve vendos të ballafaqojë të atin e djalit me ngjarjen e ndodhur. Por, në vend që të gjejë mirëkuptim, familja i hedh poshtë akuzat e saj dhe e kthen atë në cakun e sulmeve, duke e detyruar të luftojë kundër shpifjeve për të mbrojtur dinjitetin e saj. Si nënë e ve dhe si emigrante, ajo detyrohet të përballet kokë më kokë me institucionet e drejtësisë dhe barrierat e paragjykimeve shoqërore, në përpjekje për të dëshmuar pafajësinë e plotë dhe për t'i garantuar të birit një të ardhme më të sigurt. Pjesë e kastit artistik do të jetë gjithashtu aktori i njohur gjerman, Moritz Bleibtreu, i cili do të mishërojë figurën e kryetarit të familjes gjermane në qendër të fokusit. Pjesa tjetër e aktorëve pritet të zbulohet zyrtarisht gjatë javëve në vijim. Ky produksion kinematografik do të xhirohet në tri gjuhë të ndryshme: gjermanisht, anglisht dhe turqisht, duke i dhënë një dimension global që i përshtatet në mënyrë perfekte kontekstit të ngjarjeve dhe vendndodhjes. Sipas agjendës paraprake, Hande Erçel pritet të vendoset në Berlin afërsisht katër javë para fillimit të punës në sheshxhirim. Fazat e përgatitjes do të përfshijnë punën e detajuar me psikologjinë e personazhit, trajnimin gjuhësor dhe provat e përbashkëta me ekipin artistik. Regjisori dhe skenaristi Nader Saeivar, me qendër në Berlin, njihet gjerësisht për bashkëpunimet e tij me regjisorin e mirënjohur Jafar Panahi. Saeivar dhe Panahi kanë marrë një nominim për çmimin prestigjoz Oscar për skenarin e filmit “It Was Just an Accident”, i cili u kurorëzua me Palmën e Artë në Festivalin e Kanës në vitin 2025. Në aspektin e prodhimit, projekti mbështetet nga Said Nur Akkus përmes kompanisë gjermane “Arthood Films”, si dhe nga Emre Oskay nëpërmjet shtëpisë filmike turke “Sky Films”. Ky bashkim forcash ndërlidh industritë e filmit të Gjermanisë dhe Turqisë përmes një drame që ndërthur të dyja kulturat. Aktorja Hande Erçel gëzon një famë ndërkombëtare fale roleve të saj në serialet e njohura “Aşk Laftan Anlamaz” dhe “Sen Çal Kapımı”, si dhe angazhimeve në filmat kinematografikë “Intoxicated by Love” dhe “Chasing the Wind”. Përmes angazhimit te “Diaspora”, ajo pritet të shënojë një tjetër moment kthese në rrugëtimin e saj profesional, duke pranuar një sfidë të re artistike në një film evropian shumëgjuhësh që preokupohet me tema të mprehta sociale. Për momentin, nuk është bërë e ditur data e saktë se kur do të nisin xhirimet në terren apo dita e shfaqjes së premierës për publikun.