Lidhjet Tiranë-Shkup, themel i sigurt për forcimin e bashkëjetesës dhe fqinjësisë së mirë

Në kuadër të vizitës së tij zyrtare në kryeqytetin shqiptar, ministri për Marrëdhënie ndërmjet Bashkësive, Agon Ferati, ka zhvilluar një takim pune me kryetarin e Kuvendit të Republikës së Shqipërisë, Niko Peleshi, ku në fokus kanë qenë thellimi i partneritetit dypalësh, bashkëpunimi ndërinstitucional dhe sfidat e kohezionit shoqëror, bëjnë të ditur burimet zyrtare nga ministria. Gjatë bisedës, ministri Ferati vuri në dukje se një rajon më i integruar, më i lidhur ekonomikisht dhe me orientim të qartë evropian kërkon domosdoshmërisht dialog të hapur, ndarje të eksperiencave pozitive dhe nisma të përbashkëta konkrete. “Avancimi i marrëdhënieve ndërmjet dy vendeve në një stad të ri është parakusht për funksionimin edhe më efektiv të Marrëveshjes së Ohrit”, ishte mesazhi i qartë që ministri Ferati ia përcolli kryetarit të Kuvendit të Shqipërisë, Niko Peleshi, gjatë takimit të tyre në Tiranë. Bashkëbiseduesit analizuan gjithashtu rëndësinë e ruajtjes dhe kultivimit të fqinjësisë së shkëlqyer, duke theksuar domosdoshmërinë e koordinimit institucional për çështjet që prekin komunitetet, cilësinë e jetës, përfshirjen sociale dhe forcimin e lidhjeve ndërmjet qytetarëve. Ferati shprehu falënderimet e tij për mikpritjen e ngrohtë dhe diskutimin e frytshëm, i cili u zhvillua në një periudhë kur Kuvendi i Shqipërisë po shqyrtonte projektligjin për reformën territoriale të bashkive në vend. Në vijim të agjendës së tij, në kuadër të Forumit të Biznesit të Ballkanit, zyrtari i lartë u takua edhe me Jorida Tabakun, personalitet i lartë drejtues i Partisë Demokratike të Shqipërisë, të cilën e vlerësoi lart për kontributin dhe profilin e saj të respektuar ndërkombëtarisht. Gjatë këtij takimi, dy bashkëbiseduesit shkëmbyen mendime rreth bashkëpunimit brenda strukturave të familjes politike evropiane dhe sfidave të përbashkëta në procesin e integrimit rajonal drejt Bashkimit Evropian. “Do të vazhdojmë të ecim së bashku në këtë rrugëtim evropian”, u shpreh Ferati, duke dhënë garanci se angazhimi për partneritete afatgjata mbetet çelësi i suksesit për të ardhmen evropiane të të gjithë rajonit.