Në mbështetje të Lewis Hamilton: Kim Kardashian elektrizon pistën e Formula 1 në Singapor

Ylli amerikan i ekranit dhe biznesit ka bërë një paraqitje të bujshme të shtunën në Çmimin e Madh të Singaporit, ku ka qenë e pranishme për të përkrahur partnerin e saj, pilotin e njohur Lewis Hamilton. E veshur me një fustan të gjatë ngjyrë rozë që i përshtatej në mënyrë perfekte linjave trupore, 45-vjeçarja u shndërrua menjëherë në qendër të vëmendjes në zonën e bokseve. Pamjen e saj ajo e përmbylli me syze të errëta oversize, ndërkohë që në ecjen e saj shoqërohej nga një mike dhe truproja e saj. Sapo shkeli në pistën e “Marina Bay Street Circuit”, famëmadhja u vu në shënjestër të objektivave dhe admiruesve, të cilët nxitojnë të kapnin çdo çast të pranisë së saj përgjatë mjediseve të garës. Kjo vizitë nuk kaloi pa u vënë re as nga transmetuesit dhe komentatorët e ngjarjes sportive. Kur ajo u shfaq në monitorët e transmetimit të drejtpërdrejtë, zëri i njohur i “Sky Sports”, Martin Brundle, bëri një batutë thumbuese, duke sjellë ndërmend një situatë të sikletshme nga e kaluara kur kishte tentuar pa sukses ta intervistonte. “Unë jam përpjekur një herë”, u shpreh ai, duke evokuar ngjarjen e ndodhur gjatë Çmimit të Madh të Monakos në muajin qershor. Gjatë atij episodi, Kim dhe motra e saj Khloe Kardashian kishin shmangur plotësisht gazetarin teksa ai ishte afruar për t'u marrë një prononcim. Ngjarja kishte shkaktuar jo pak bujë dhe reagime të ashpra nga ndjekësit në rrjet, të cilët e kishin kritikuar sjelljen e tyre. Romanca e përfolur mes yllit televiziv dhe kampionit të Formula 1 thuhet se ka nisur rreth muajit shkurt të këtij viti, ndërsa tashmë dyshja nuk e fsheh më lidhjen e tyre as në platformat digjitale. Kjo shfaqje e bujshme në Singapor vjen në një periudhë kur kureshtja e mediave është e përqendruar te lidhja e saj me shtatë herë kampionin e botës, krahas zhvillimeve në pistë. Hamilton zhvilloi garën sprint të shtunën në Singapor, duke synuar një pozicionim sa më të favorshëm në sesionin e kualifikimeve për garën zyrtare të së dielës. Kjo garë mbetet një nga ngjarjet më unike në kalendarin e Formula 1, pasi zhvillohet nëpër rrugët urbane të qytetit nën dritat e natës, një traditë kjo e nisur që nga viti 2008 kur ky vend u bë pjesë e kampionatit global.