Qëndrim i prerë nga Sofja: Korniza e vitit 2022 me Shkupin mbetet e paprekshme

Zyrtarja e lartë e diplomacisë bullgare ka përjashtuar çdo mundësi për ndryshime kushtetuese me hyrje të vonuar në fuqi dhe ka theksuar se Sofja nuk do të hyjë në rinegociim të kushteve të përcaktuara në marrëveshjen e vitit 2022 me Maqedoninë e Veriut. Këtë qëndrim e ka përsëritur ministrja e Jashtme, Velisllava Petrova Çamova, para deputetëve në Kuvendin e Bullgarisë, vetëm një ditë pasi zhvilloi një takim zyrtar në Sofje me homologun e saj maqedonas, Timço Mucunski. Sipas kryediplomates bullgare, kërkesat e shtetit të saj ndaj autoriteteve në Shkup mbeten absolutisht të pandryshuara, duke përfshirë garantimin e të drejtave të pakicës bullgare dhe përfshirjen e tyre formale në tekstin e Kushtetutës. “A kemi arritur marrëveshje për ndryshime kushtetuese me zbatim të prolonguar? Përgjigja është “jo”. Ministria e Punëve të Jashtme qëndron pas marrëveshjes së vitit 2022 dhe kategorikisht hedhim poshtë mundësinë e çfarëdo anashkalimi, rinegociimi, dakordësie me vende të caktuara anëtare për çfarëdo lloj dakordësie që do të ndryshonin kushtet e marrëveshjes së arritur. Bullgaria nuk merr pjesë në rinegociimin e marrëveshjes me Shkupin. Nuk kemi nevojë për rinegociim dhe rimarrëveshje sepse ata janë të papranueshme për ne”, deklaroi Velisllava Petrova Çamova, Ministre e Jashtme e Bullgarisë. Ky ballafaqim verbal vjen pas takimit dypalësh të zhvilluar një ditë më parë në kryeqytetin bullgar, në kuadër të zhvillimeve të Konferencës për Korridorin 8. Edhe pse ministri Timço Mucunski e cilësoi bisedën si konstruktive dhe të zhvilluar në një atmosferë pozitive, ai pranoi se hendeku mes pozicioneve të të dyja palëve mbetet i madh. Ai u shpreh se lidhur me procesin e integrimit evropian ekziston një shkallë e lartë mosbesimi, e cila, sipas perspektivës së Shkupit, lidhet ngushtë me mungesën e parashikueshmërisë dhe përvojën e deritanishme me kushtëzimet dypalëshe. Zhvillimet nga ky takim kanë marrë vëmendje të gjerë në opinionin publik dhe në mediat kryesore në Bullgari. Pavarësisht tonit miqësor të raportuar gjatë takimit, agjencitë kryesore mediatike në vend kanë theksuar se nuk ka asnjë lëvizje reale nga pozicionet zyrtare dhe se kushtet e Sofjes për rrugëtimin evropian të Shkupit mbeten të panegociueshme.