Zhdukje misterioze apo skenar për t’i shpëtuar drejtësisë? Çfarë po ndodh me Inez Hajrullën

Një enigmë e re ka mbështjellë fatin e Inez Hajrullës, personazhit të njohur të shpallur në kërkim ndërkombëtar nga SPAK, duke vënë në gatishmëri strukturat e Policisë së Vlorës. Prej dy ditësh, ai ka shkëputur çdo lloj komunikimi me babanë e tij, Robert Hajrulla, ndërsa shqetësimi është përhapur edhe mes miqve të tij të ngushtë, të cilët thonë se i kanë humbur gjurmët. Në dëshminë e tij dhënë para autoriteteve, babai i të kërkuarit është shprehur se mungesa e kontakteve për dy ditë nuk përbën domosdoshmërisht shkak për alarm. Duke qenë se i biri ndodhet në arrati, ata nuk flasin çdo ditë me njëri-tjetrin. Ai ka deklaruar se beson që Inez Hajrulla gjendet jashtë kufijve të vendit dhe se do të paraqitet në polici për të denoncuar zhdukjen vetëm nëse afati prej 72 orësh kalon pa asnjë shenjë jete apo telefonatë prej tij. Megjithatë, situata komplikohet nga dëshmitë e rrethit shoqëror të Hajrullës. Sipas tyre, ai ndodhej në kryeqytet, ku dyshohet se është shoqëruar nga persona që mbanin veshur jelekë të ngjashëm me ata të Byrosë Kombëtare të Hetimit (BKH). Përpjekjet e miqve të tij për të zbuluar se në cilin ambient policor ishte dërguar kanë rezultuar të kota, pasi emri i tij nuk figuronte i ndaluar në asnjë prej komisariateve. Këtu nis edhe pikëpyetja më e madhe: nëse ai është ndaluar nga individë që janë hequr si agjentë të BKH-së, ku është fshehur më pas? Apo bëhet fjalë për një lëvizje të mirëmenduar për t'i ikur drejtësisë? Hipotezat mbeten të hapura. Hetuesit nuk përjashtojnë mundësinë e një rrëmbimi nga grupet rivale me të cilat ai ka pasur konflikte të ashpra, por nga ana tjetër nuk hidhet poshtë as pista se Hajrulla ka fshehur vetveten për të shmangur prangat. Deri më tani, asnjëra prej këtyre versioneve nuk është konfirmuar zyrtarisht. Ndërkohë, uniformat blu kanë nisur hetimet dhe verifikimet e nevojshme për të zbardhur të vërtetën e këtij rasti. Emri i Inez Hajrullës lidhet prej vitesh me ngjarje të rënda të krimit të organizuar në qytetin bregdetar. Ai kërkohet me urdhër të SPAK-ut për vepra penale në kuadër të grupit të strukturuar kriminal dhe vrasjes. Pas eliminimit të Edison Harizajt, i njohur si Edison Faqedjeguri, në vitin 2018, Hajrulla dyshohet se mori frenat e drejtimit të këtij grupi. Seria e përplasjeve të përgjakshme me fraksionet e tjera kriminale në Vlorë, bashkë me dështimet e njëpasnjëshme të operacioneve për arrestimin e tij, e bëjnë këtë ngjarje edhe më të ndërlikuar për organet ligjzbatuese.