Kërkesa e çuditshme e Zvicrës në Shkup: Kërkojnë kositjen e barit para përballjes në Ligën e Kombeve

Maqedonia e Veriut nis mbrëmjen e sotme rrugëtimin e saj në edicionin e ri të Ligës së Kombeve, ku garon në Divizionin B. Në kuadër të ndeshjes së parë të kësaj faze, e cila do të nisë në orën 20:45, stadiumi “Todor Proeski” në Shkup do të jetë nikoqir i Përfaqësueses së fortë të Zvicrës. Përfaqësuesja helvetike kishte paralajmëruar që gjatë konferencës për shtyp të mbajtur mbrëmjen e djeshme se do të ngrinte shqetësimin e saj lidhur me lartësinë e tapetit të gjelbër në stadiumin e kryeqytetit maqedonas. Kjo çështje është ngritur zyrtarisht gjatë takimit zyrtar mes palëve ditën e sotme, një procedurë kjo standarde që paraprin çdo ndeshje ndërkombëtare nën kujdesin e organizimit të UEFA-s, ku ky problem u vu në dukje edhe zyrtarisht. Konkretisht, delegacioni zviceran ka kërkuar që bari i fushës të kositet në lartësinë e përcaktuar prej tre centimetrash, duke respektuar standardet e duhura, ndryshe nga gjendja aktuale ku lartësia e tij arrin rreth shtatë centimetra. Për të ilustruar këtë pakënaqësi, trajneri i Zvicrës, Murat Yakin, u shfaq në konferencën e djeshme për shtyp duke mbajtur në duar një copë bari të shkulur nga fusha e stadiumit “Todor Proeski”. Ai e përdori këtë element si dëshmi për të dëshmuar se sipërfaqja nuk është kositur në nivelin e duhur, duke lënë të kuptohet se gjendja e papërshtatshme e fushës mund të ndikojë negativisht në rrjedhën dhe ritmin e lojës.