Plagosja e 33-vjeçarit nga Kosova në Tiranë: Policia zbardh ngjarjen, shpallet në kërkim autori dhe vihen në pranga disa persona

Policia e Shtetit ka arritur të zbardhë brenda 24 orëve rrethanat e plota të ngjarjes së rëndë të regjistruar një ditë më parë në rrugën “Hysni Gërbolli”, ku mbeti i plagosur me armë zjarri një shtetas nga Kosova. Forcat e rendit kanë identifikuar autorin e dyshuar dhe kanë nisur kërkimet intensive për kapjen e tij, ndërkohë që janë marrë masa ligjore edhe ndaj personave të tjerë të përfshirë në konflikt. Falë ndërhyrjes së shpejtë dhe veprimeve profesionale hetimore të kryera nga shërbimet e Komisariatit të Policisë Nr. 3, është dokumentuar ngjarja e ndodhur më datë 25.09.2026. Sipas hetimeve paraprake, gjatë një konflikti në ambientet e një lokal, 54-vjeçari me iniciale S. P. ka qëlluar me armë zjarri në drejtim të 33-vjeçarit Gj. K., duke e lënë të plagosur në këmbë, para se të largohej me shpejtësi nga vendi i ngjarjes. I dyshuari kryesor është shpallur në kërkim për një sërë veprash penale, përfshirë “Vrasja e mbetur në tentativë”, “Prodhimi dhe mbajtja pa leje e armëve luftarake dhe e municionit”, “Mbajtja pa leje e armëve të ftohta” dhe “Prishja e qetësisë dhe rendit publik”. Gjatë kontrollit të ushtruar në banesën e tij, shërbimet e policisë gjetën dhe sekuestruan në cilësinë e provës materiale një armë gjahu, një mjet prerës (thikë), si dhe municion luftarak. Në kuadër të hetimeve, uniformat blu kanë arrestuar në flagrancë 20-vjeçarin S. T., i cili dyshohet se është përfshirë në përleshje fizike duke përdorur sende të forte dhe duke lënduar 18-vjeçarin A. P. Ndaj tij rëndojnë akuzat për “Plagosja e lehtë me dashje”, “Moskallëzimi i krimit” dhe “Prishja e qetësisë dhe rendit publik”. Ndërkaq, është iniciuar procedimi penal në gjendje të lirë për B. P. (49 vjeç) dhe S. P. (18 vjeç), të cilët dyshohet se gjatë përplasjes kanë goditur me sende të forta shtetasin S. T., ndërsa në banesën e 49-vjeçarit u zbuluan dhe u sekuestruan gjithashtu fishekë. Një zhvillim tjetër i rëndësishëm ka ndodhur gjatë verifikimit të të dhënave të shtetasit të plagosur, Gj. K., 33 vjeç. Pasi iu nënshtrua kontrolleve, rezultoi se ai ishte person i shpallur në kërkim ndërkombëtar nga autoritetet e Kosovës. Ai rezulton i dënuar nga Gjykata Themelore në Gjakovë me 50 ditë burgim për veprën penale të posedimit të paautorizuar të narkotikëve dhe substancave psikotrope ose analoge, ndaj dhe është vënë në pranga me qëllim ekstradimi. Të gjitha materialet procedurale dhe provat e mbledhura i kanë kaluar për ndjekje të mëtejshme Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të hollësishme hetimore.