Tragjedia në Gjilan, Prokuroria zbardh detajet e krimit makabër që tronditi vendin

Prokuroria Themelore në Gjilan ka dalë me një njoftim zyrtar lidhur me ngjarjen e rëndë kriminale të regjistruar të premten në fshatin Livoç i Poshtëm, ku si pasojë e të shtënat me armë zjarri mbetën të vdekur dy persona dhe u plagos rëndë një tjetër. Sipas të dhunave zyrtare të institucionit të akuzës, dyshimet e para tregojnë se 38-vjeçari me inicialet V.R., banor i Gjilanit, për arsye që mbeten ende plotësisht të paqarta, ka qëlluar për vdekje me armë zjarri bashkëshorten e tij, 27-vjeçaren N.B., si dhe vëllain e saj, 31-vjeçarin E.B. Në të njëjtin incident tragjik, autori i dyshuar ka plagosur rëndë edhe djalin e xhaxhait të bashkëshortes, 48-vjeçarin M.B., i cili aktualisht po merr trajtimin e nevojshëm mjekësor në Qendrën Klinike Universitare të Kosovës (QKUK) për shkak të dëmtimeve të rënda trupore. Autoritetet policore janë njoftuar për këtë ngjarje alarmante më datë 9 tetor 2026, rreth orës 14:30. Menjëherë pas marrjes së informatës, në vendngjarje kanë mbërritur njësitet kompetente policore së bashku me prokurorin kujdestar, të cilët kanë nisur ndërmarrjen e veprimeve të ngutshme hetimore për të hedhur dritë mbi motivet dhe dinamikën e krimit. Gjatë kontrollit të detajuar të skenës së krimit, hetuesit kanë konfiskuar një armë zjarri pistoletë të llojit “Beretta”, e cila rezulton me leje të skaduar dhe që dyshohet se është përdorur në kryerjen e kësaj vepre penale, si dhe prova të tjera materiale me rëndësi për hetimin. Në kuadër të zgjerimit të hetimeve, organet e rendit kanë kryer bastisje në tri lokacione të ndryshme që lidhen me pronat e personit të dyshuar, ku gjithashtu janë siguruar dëshmi shtesë materiale. Nga verifikimet e deritanishme, Prokuroria ka bërë të ditur se i dyshuari nuk figuron me ndonjë të kaluar kriminale dhe se në polici nuk ka pasur asnjë denoncim të mëparshëm ndaj tij për dhunë në familje. Prokuroria Themelore në Gjilan ka theksuar se, në bashkëpunim të ngushtë me Policinë e Kosovës, do të vijojë angazhimin e pandërprerë hetimor derisa të zbardhen plotësisht të gjitha rrethanat dhe shkaqet që çuan në këtë ngjarje të rëndë.