Sjellja skandaloze e tifozëve, UEFA merr masë të rëndë ndaj Partizanit të Beogradit

Shtëpia evropiane e futbollit, UEFA, ka ndërmarrë masa disiplinore ndaj klubit serb Partizani i Beogradit, duke e ndëshkuar me një gjobë prej 42 mijë eurosh dhe me mbyllje të pjesshme të stadiumit për ndeshjen e ardhshme në garat evropiane. Këto sanksione vijnë si pasojë e veprimeve të tifozëve gjatë sfidës kualifikuese të Ligës së Konferencës kundër skuadrës spanjolle Getafe. Megjithëse mediat në Serbi kanë shmangur dhënien e detajeve specifike rreth motiveve të këtij ndëshkimi, masat merren pas thirrjeve dhe provokimeve të drejtuara ndaj shtetit të Kosovës. Sipas njoftimit zyrtar nga UEFA, për shkak të sjelljes diskriminuese të mbështetësve, është aktivizuar një dënim i mëparshëm me kusht i datës 28 korrik. Ky vendim sjell mbylljen e një sektori prej 5.000 ulësesh në stadiumin e Humska-s në kryeqytetin serb për sfidën e ardhshme evropiane të skuadrës. Po ashtu, klubit i është vendosur një tjetër masë kufizuese për mbylljen e një zone prej 15.000 vendesh në stadiumin e tyre, si pasojë e drejtpërdrejtë e shfaqjeve raciste dhe diskriminuese nga ana e tifozerisë.