Gjiganti teknologjik Microsoft zbulon serinë e re Surface: Çmimet e pajisjeve të fuqizuara nga AI kapërcejnë shifrën e 5,000 dollarëve

Microsoft ka zbuluar zyrtarisht në San Francisko detajet teknike dhe çmimet për gjeneratën më të re të kompjuterëve Surface, të cilët vijnë të pajisur me çipin e avancuar RTX Spark të Nvidia-s dhe janë projektuar posaçërisht për të përpunuar lokalisht modelet e inteligjencës artificiale. Kujtojmë se Nvidia kishte bërë publike që në muajin qershor aleancën e saj me Microsoftin dhe kompani të tjera për ndërtimin e PC-ve me sistemin Windows, të dizajnuara enkas për inteligjencën artificiale dhe agjentët e saj, ndërsa tani janë zbuluar edhe specifikat dhe çmimet konkrete. Gjatë një eventi të organizuar të mërkurën në kuadër të Tech Week në San Francisko, Microsoft solli në vëmendje Surface Laptop Ultra, i cili do të ofrohet në dy variante bazë. Çmimi i modelit fillestar do të jetë rreth 2,600 dollarë, kurse ai i versionit më performues do të nisë nga 3,700 dollarë. Për konfigurimet me kapacitete më të larta të memories dhe hapësirës ruajtëse, vlera mund të shkojë deri në 5,900 dollarë, me kompaninë që konfirmon se opsioni më i kushtueshëm është shitur tashmë plotësisht. Po ashtu, gjatë këtij aktiviteti u prezantua edhe Surface RTX Spark Dev Box, një stacion pune me një çmim prej 6,000 dollarësh, i cili vjen i pajisur paraprakisht me mjete të domosdoshme për zhvilluesit si VS Code, GitHub Copilot CLI, WSL dhe PowerShell 7. Të dyja këto pajisje janë ndërtuar me qëllim që të ekzekutojnë modelet e inteligjencës artificiale në mënyrë lokale direkt në kompjuter, duke eliminuar në këtë mënyrë shpenzimet shtesë që vijnë nga përdorimi i shërbimeve në cloud. Ky proces realizohet përmes bashkëveprimit të procesorit, kartës grafike, memories së unifikuar dhe një sistemi ftohjeje të përmirësuar ndjeshëm. Për më tepër, sistemi operativ Windows 11 sjell risinë e quajtur Execution Containers, që lejon funksionimin e izoluar të agjentëve të inteligjencës artificiale. Drejtori ekzekutiv i Microsoftit, Satya Nadella, bëri të ditur se ky funksionalitet do të jetë i aksesueshëm për të gjithë përdoruesit e Windows 11. Nadella theksoi gjatë fjalës së tij se prania e një modeli të inteligjencës artificiale nuk mjafton e vetme, por kërkohet një shtresë ndërlidhëse që integrohet me modelet e tjera, kontekstin, memorien dhe aftësinë për të ndërmarrë veprime konkrete. Pajisjet e reja synojnë kryesisht tregun e programuesve. Në kuadër të promovimit, Microsoft po ofron një zbritje deri në 1,000 dollarë për blerësit që dorëzojnë laptopin e tyre ekzistues MacBook Pro gjatë blerjes së një modeli të ri Surface. Kompania thekson gjithashtu se, falë performancës së lartë grafike, këta laptopë janë ideale edhe për krijuesit e përmbajtjes, montazhin e videove dhe lojërat. Në të njëjtën ditë, rivali i tyre Dell publikoi detaje rreth modelit XPS 16 Creator Edition, i cili gjithashtu shfrytëzon të njëjtin çip. Ky model tashmë mund të porositet paraprakisht në Shtetet e Bashkuara të Amerikës kundrejt çmimit prej 3,800 dollarësh, ndërsa dërgesat në terren parashikohet të nisin gjatë muajit tetor.