Bllokimi humanitar në kufi: Autoritetet serbe ndalojnë delegacionin nga Kosova që po udhëtonte për ngushëllime në Preshevë

Kryetarja e Preshevës, Ardita Sinani, ka denoncuar veprimin e autoritetit serb, të cilët kanë penguar hyrjen në territorin e tyre të tre deputeteve nga Kosova, Arbërie Nagavci, Fatmire Mullhaxha Kollçaku dhe Liza Gashi, të cilat kishin udhëtuar për t'i shprehur asaj ngushëllime me rastin e vdekjes së babait të saj. Delegacioni zyrtar përfshinte gjithashtu ambasadorin e Kosovës në Beograd, Jetish Jashari, si dhe Ragmi Mustafin, këshilltar i kryeministrit Albin Kurti për Preshevë, Medvegjë e Bujanoc, ky i fundit i ngarkuar me detyrën për të përcjellë ngushëllimet institucionale nga kryeministri. Pavarësisht natyrës private, njerëzore dhe tradicionale të vizitës, e cila nuk kishte asnjë karakter politik apo zyrtar, autoritetet kufitare në Depcë i mbajtën ata për disa orë para se t'ua refuzonin përfundimisht lejen e kalimit. Duke komentuar këtë vendim, Sinani ka theksuar se kjo dëshmon qartë se aparati shtetëror i Serbisë gjen kënaqësi në pengimin e çdo kontakti njerëzor, vetëm pse bëhet fjalë për përfaqësues shtetërorë nga Republika e Kosovës. Ajo shtoi se politika është përfshirë në mënyrë të turpshme madje edhe në raste mortore dhe tradita njerëzore për ndarjen e dhimbjes. Përballë kësaj situate të papranueshme, Sinani së bashku me familjarët e saj u detyrua të kalonte në territorin e Republikës së Kosovës, në pikën kufitare të Depcës, për t'u takuar dhe për të pranuar ngushëllimet e sinqerta nga delegacioni, të cilët i sollën asaj edhe mesazhin ngushëllues nga kryetarja e Kuvendit të Kosovës, Albulena Haxhiu. Duke e cilësuar këtë si një dëshmi të qartë të politikës diskriminuese që Serbia aplikon në çdo aspekt të jetës, Sinani shprehu besimin se fqinji verior ka marrë mesazhin se lidhjet shpirtërore dhe kombëtare nuk mund të thyhen nga pengesa të tilla artificiale. Në fund, ajo falënderoj nga zemra të gjithë anëtarët e delegacionit për solidaritetin dhe kohën e kushtuar në këto momente të vështira për familjen e tyre.