Tragjedia në Gjilan, RrGK: Asnjë rrethanë nuk mund të përligjë dhunën ndaj grave

Rrjeti i Grave të Kosovës (RrGK) ka ngritur alarmin dhe ka shprehur shqetësimin e thellë lidhur me vrasjen e një gruaje në Gjilan, e cila dyshohet se është privuar nga jeta nga bashkëshorti i saj. Ngjarja e rëndë dyshohet se ka lënë të vdekur edhe vëllain e viktimës, ndërkohë që një person tjetër ka pësuar lëndime nga plagët e marra. Në deklaratën e lëshuar për media, kjo organizatë ka theksuar se çfarëdo mosmarrëveshje apo konflikti paraprak nuk përbën arsyetim për aktin e vrasjes së një gruaje, duke kërkuar një hetim të gjithanshëm të ngjarjes dhe ndëshkimin e autorit përgjegjës para ligjit. “Dhuna ndaj grave nuk është çështje private, por shkelje e rëndë e të drejtave të njeriut, ndaj së cilës institucionet duhet të veprojnë me përgjegjësi dhe pa vonesa”, thuhet në reagimin e RrGK-së. Organizata ka bërë thirrje për një angazhim të shtuar institucional dhe shoqëror, si dhe për ndërmarrjen e hapave konkretë që shërbejnë për parandalimin e dhunës dhe mbrojtjen e sigurisë së grave në shoqëri. Krahas kësaj, RrGK ka rikujtuar se mbetet në dispozicion për të ofruar mbështetje dhe këshillim ligjor falas për të gjitha personat që ballafaqohen me dhunë me bazë gjinore. Kujtojmë se incidenti i armatosur ndodhi të premten në fshatin Livoç i Ulët të Gjilanit, ku humbën jetën dy persona rreth të 30-tave, një burrë dhe një grua, kurse një tjetër mbeti i plagosur.