Tragjedi në Livoq të Gjilanit: Dyshohet për vrasje të dyfishtë dhe disa të plagosur

Një ngjarje e rëndë ka tronditur pasditen e së premtes fshatin Livoq të Gjilanit, ku dyshohet se një person ka privuar nga jeta bashkëshorten dhe një mik, si dhe ka lënë të plagosur tre persona të tjerë, sipas të dhënave paraprake nga terreni. Bazuar në informacionet e para, dyshohet se viktima i takon familjes Bogujevci nga Livoqi, kurse i dyshuari për veprën penale është nga familja Ramushi e fshatit Llashticë. Paraprakisht dyshohet se motivi i këtij incidenti tragjik mund të ketë lidhje me mosmarrëveshje familjare dhe një kërkesë të mundshme për divorc, megjithëse këto detaje mbeten ende pa konfirmim zyrtar. Forca të shumta të Policisë së Kosovës kanë zbarkuar menjëherë në vendin e ngjarjes dhe po merren intensivisht me zbardhjen e rrethanave të këtij rasti të rëndë. Zëdhënësi i Policisë për rajonin e Gjilanit, Ismet Hashani, i kontaktuar nga redaksia jonë, ka bërë të ditur se autoritetet do të dalin me një deklaratë zyrtare për media sapo të jenë kompletuar detajet e para nga hetimet në terren.