Avokati i Popullit paralajmëron vështirësi në terren për zbatimin e Ligjit për Gjykatën Speciale

Miratimi në Kuvend i Ligjit për Dhomat e Specializuara dhe Zyrën e Prokurorit të Specializuar ka nxitur një valë debatesh dhe reagimesh në vend. Partnerët ndërkombëtarë kanë shprehur rezerva të theksuara, duke vlerësuar se një akt i tillë legjislativ nuk i shërben integrimit evropian të Kosovës. Ndërkombëtarët kanë bërë thirrje që mandati dhe veprimtaria e kësaj gjykate të respektohen plotësisht nga të gjithë aktorët institucionalë. Në një prononcim për Radio Dukagjinin, Avokati i Popullit, Naim Qelaj, ka ngritur shqetësimin se faza e jetësimit të këtij ligji në praktikë do të shoqërohet me pengesa të shumta. “Jo pse unë besoj që jam autoriteti që mund ta di saktë se ku qëndron ky ligj në raport me Gjykatën e Hagës, por nga të gjitha analizat që kam vlerësuar nga të tjerët, por edhe analizën që vetë e kam bërë, rezulton se do të ketë probleme në zbatimin e këtij ligji. Është vullnet i deputetëve, vullnet i atyre që na përfaqësojnë të vendosin se çfarë ligji do të nxjerrin. Se si do të shkojë rrugës, mbetet të shihet. Jemi para një situate me shumë dilema, me shumë pikëpyetje”, u shpreh ai. Gjithashtu, Qelaj ka njoftuar se më 14 tetor do të jetë nikoqir i një punëtorie tematike, ku do të diskutohen gjetjet dhe analizat zyrtare të institucionit të Avokatit të Popullit lidhur me Dhomat e Specializuara.