Kompany thotë fjalën e fundit: Paraqitjet në kombëtare nuk ndryshojnë planet e mia te Bayerni

Trajneri i Bayern Mynihut, Vincent Kompany, ka adresuar hapur situatën e mesfushorit të ri Tom Bischof, pasi ky i fundit la mbresa me paraqitjet e tij së fundmi në radhët e kombëtares gjermane, krahas bashkëklubasit Aleksandar Pavlloviq. Kjo paraqitje e shkëlqyer në arenën ndërkombëtare ka sjellë në vëmendje minutat e pakta që 21-vjeçari ka siguruar deri më tani nën urdhërat e teknikut belg, ku ka regjistruar vetëm 205 minuta nga 630 të mundshmet në këtë nisje sezoni, pas konkurrencës së fortë nga emra si Joshua Kimmich dhe Pavlović. Në përgjigje të interesimit të gazetarëve, strategu nga Belgjika ka zhvilluar një sqarim të zgjeruar prej rreth tre minutash e gjysmë, duke e cilësuar menaxhimin e minutave të Bischof si një proces krejtësisht normal për këtë fazë të kampionatit: “Kombëtarja nuk luan asnjë rol në vendimet e mia për formacionin titullar”. Më tej, ai shtoi se ndihet i lumtur kur futbollistët e tij shkëlqejnë me përfaqësueset e tyre: “Jam absolutisht i kënaqur kur lojtarët kthehen me ndjesi pozitive. Ky është një faktor që e marr parasysh, sepse dua që djemtë të ndihen mirë”. Për ta mbyllur diskutimin me tone pozitive, tekniku i bavarezëve ka bërë edhe një batutë kushtuar atyre lojtarëve që mund të kthehen të pakënaqur nga detyrat ndërkombëtare. “Ata mund ta lënë pas zhgënjimin dhe të rikthehen duke kujtuar ndeshjen e fundit me Bayernin; fitoren 7-0 në shtëpi, ku të gjithë zhvilluan një paraqitje të jashtëzakonshme”, – përfundoi ai, duke kujtuar suksesin e thellë kundër Union Berlin para se kampionati të ndërpritej për shkak të ndeshjeve të kombëtareve.