Pamje apokaliptike në Siçili: Tornadoja e fuqishme përmbys makina dhe plagos rëndë qytetarët

Një stuhi e dhunshme e tipit tornado ka goditur zonën e bregdetit perëndimor të Siçilisë në Itali, duke shkatërruar infrastrukturën dhe duke plagosur disa persona, mes të cilëve edhe të mitur. Ngjarja e rëndë është regjistruar në territorin e Marsalës, ku erërat vrastare kanë arritur të rrokullisin automjete, të dëmtojnë pronat dhe të paralizojnë qarkullimin rrugor. Rrjetet sociale janë mbushur me pamje dramatike, ku dallohet qartë një vorbull kolosale mbeturinash dhe pluhuri që marshon përgjatë vijës detare, duke ngritur peshë çdo gjë që i del përpara. Burimet zyrtare bëjnë me dije se dy qytetarë kanë pësuar lëndime të rënda, pasi makina me të cilën po lëviznin është flakur nga intesiteti i erës brenda një përroi. Gjendja e tyre shëndetësore mbetet ende për t'u sqaruar plotësisht nga autoritetet mjekësore. Fenomeni i rrallë atmosferik ka goditur gjithashtu institucionin arsimor “Alcide De Gasperi” në vendbanimin Strasatti. Gjatë orarit mësimor, një vorbull e dyfishtë ka depërtuar në ambientet e shkollës, duke thyer xhamat dhe duke rrëzuar raftet e librave, çka ka sjellë skena paniku mes nxënësve dhe arsimtarëve. Ekipet e shpëtimit kanë ndërhyrë menjëherë për të dhënë ndihmën e parë. Fatmirësisht, dëmtimet e pësuara brenda shkollës nuk paraqesin rrezik për jetën e fëmijëve, ndonëse një djalë është dërguar me urgjencë drejt spitalit rajonal. Përveç kësaj, janë evidentuar dëme të konsiderueshme në objekte të ndryshme banimi, çatia e të cilave është shkatërruar plotësisht nga fuqia e erërave. Imazhet nga terreni dëshmojnë për makina të përmbysura dhe një atmosferë të mbuluar nga retë e dendura të pluhurit. Moti i keq, i shoqëruar me reshje intensive shiu dhe stuhi, ka paralizuar rajonin për disa orë me radhë, duke prekur veçanërisht qytetin e Trapanit dhe bregdetin e Tirrenit. Ndërkohë, strukturat kompetente janë duke bërë bilancin e dëmeve materiale dhe pasojave të lëna pas nga ky fenomen i pazakontë natyror.