Kategoria e Parë ndez motorët: Gjashtë super sfidë në fushë këtë fundjavë

Kampionati i Kategorisë së Parë bëhet gati për siparin e javës së pestë, e cila do të përfshijë gjashtë ndeshje mjaft interesante të ndara përgjatë dy ditëve, më 10 dhe 11 tetor. E shtuna do të ngrejë siparin me dy takimet e para të kësaj jave. Skuadra e Bylisit do të masë forcat me Kukësin, një duel që do të vëmë në ekran për shikuesit nëpërmjet transmetimit direkt në RTSH, ndërkohë që Flamurtari do të ketë përballë Sopotit në sfidën që do të zhvillohet në Orikum. Të dyja këto përballje do të nisin njëkohësisht në orën 13:30. Emocionet do të vijojnë edhe të dielën, ku do të luhen katër sfidat e tjera të kësaj jave, gjithashtu me fillim nga ora 13:30. Korabi do të presë në shtëpi Pogradecin, Besa do të presë Ilirinë në një tjetër ndeshje të transmetuar në ekranin e RTSH-së, Burreli do të kërkojë pikët ndaj Besëlidhjes, kurse Kastrioti do të përballet me Orikun. Të gjitha klubet janë të fokusuara te ky raund për të siguruar rezultate pozitive dhe për të ecur drejt përmbushjes së objektivave sezonale në këtë garë të fortë të Kategorisë së Parë.