Alarmi në Madrid: Kylian Mbappe pëson sërish lëndim në gju gjatë detyrës me kombëtaren

Gjendja shëndetësore e Kylian Mbappe ka vënë në lëvizje stafet mjekësore të Kombëtares së Francës dhe të Real Madridit, pas shqetësimeve të shfaqura nga sulmuesi yll. Ndërkohë që Ibrahima Konate ishte larguar tashmë nga grumbullimi për arsye dëmtimi, Mbappe ka ndier dhimbje të forta në gju gjatë sfidës kundër Turqisë. Ky incident ndodhi para se të plotësohej një orë lojë, pikërisht në minutën e 54-t, kur ai realizoi golin e fitores në ndeshjen hapëse të Francës në Ligën e Kombeve të UEFA-s, duke shënuar nisjen e epokës së Zinedine Zidane në krye të përfaqësueses. Skenari i dëmtimit u shpalos kur Mbappe mori një top në skajin e zonës nga krahu i majtë dhe u përgatit për të goditur. Gjatë festimit të golit, ai kuptoi se diçka nuk po shkonte si duhet. Dhimbja u shfaq në këmbën e majtë, e cila shërbeu si këmbë mbështetëse në momentin e gjuajtjes. Pas një kërcimi të vogël si reagim automatik dhe tentativës për të festuar, ai u ndal menjëherë, ndërsa mjekët e Kombëtares hynë me urgjencë në fushë. Edhe pse Kylian u përpoq të vazhdonte lojën, sapo u rikthye në fushë dhe bëri sprintin e parë, ai u rrëzua sërish dhe kërkoi largimin nga loja. Pamja e tij me duart në fytyrë për shkak të dhimbjeve e la të qartë situatën, para se Désiré Doué të zbriste në fushë në vend të tij. kjo situatë përsërit një problem të njohur nga sezoni i kaluar, ku Mbappe u detyrua të ndalej dy herë për shkak të shqetësimeve në të njëjtin gju të majtë, pasi sipas gazetës “Marca”, stafi mjekësor dikur kishte lënë pa bërë ekzaminimin fillestar të gjurit të dëmtuar. Pas këtyre zhvillimeve, Mbappe do të kthehet në Madrid për t'i nënshtruar testeve mjekësore më të detajuara dhe për të nisur procesin e rikuperimit. Kujtojmë se Franca ka edhe tri ndeshje të tjera përpara deri më 5 tetor në Ligën e Kombeve, ku do të ketë përballje dy herë me Belgjikën dhe një herë me Italinë.