Zgjoheni të rraskapitur çdo mëngjes? Kujdes, trupi juaj po ju dërgon sinjale alarmi

Ndjenja e lodhjes që shfaqet që në orët e para të ditës dhe nuk shuhet as pas relaksit nuk duhet t'i vishet gjithmonë vetëm ngarkesës psikologjike. Nga mangësitë e gjakut dhe çrregullimet e gjëndrës tiroide, e deri te problemet e gjumit apo gjendjet depressive, shkaktarët mund të jenë mjaft të ndryshëm nga ajo që mendojmë zakonisht. Skenari i jetës bashkëkohore shpesh ndërtohet mes orarit të punës, angazhimeve familjare dhe një rryme të pafund informacionesh. Është krejtësisht normale të ndjehesh i kapryer në mbyllje të një orari të ngjeshur. Megjithatë, kur hapni sytë në mëngjes po aq të rraskapitur sa ishit mbrëmjen e kaluar, pavarësisht se keni bërë gjumë të mjaftueshëm, kjo situatë kërkon vëmendje të shtuar. Sipas të dhënave nga Mayo Clinic, plogështia afatgjatë mund të ndërlidhet me orët e pakta të gjumit, mënyrën e jetesës, përdorimin e medikamenteve të caktuara, stresin ose ankthin, por po ashtu mund të përbëjë shenjë paralajmëruese të një patologjie që kërkon ndërhyrje mjekësore. Kur pushimi nuk mjafton Nëse përballeni me lodhje kronike prej një periudhe të gjatë dhe nuk ia dilni dot të kuptoni shkakun, nuk këshillohet ta anashkaloni atë duke e konsideruar thjesht një periudhë të vështirë. Ekspertët e Shërbimit Kombëtar Shëndetësor britanik (NHS) rendisin si faktorë të mundshëm aneminë si pasojë e mungesës së hekurit, diabetin, disfunksionin e tiroides, apnenë e gjumit, çrregullimet e humorit, infeksionet e ndryshme dhe luhatjet hormonale. Një tregues mjaft domethënës është rasti kur rraskapitja ju kapluar që në mëngjes, ose kur një angazhim fizik relativisht i vogël ju lënë pa energji për një kohë të gjatë. Tiroidja nuk është i vetmi “fajtor” Kur plogështia bëhet e përhershme, mjeku i familjes mund të kërkojë kryerjen e ekzaminimeve laboratorike për të përjashtuar shkaqet më të shpeshta, siç janë anemia, diabeti apo ulja e funksionit të tiroides. Mayo Clinic vë në dukje se edhe çrregullimet e ciklit të gjumit, ku përfshihet apnea obstruktive, mund të bëjnë që një individ të zgjohet i dërrmuar edhe pas shumë orësh pushimi në shtrat. Prandaj, nuk ekziston një analizë e vetme që mund të shpjegojë çdo rast të shfaqjes së lodhjes. Çdo vlerësim klinik duhet të ndërthuret me shenjat e tjera klinike, cilësinë e gjumit, regjimin ushqimor, barnat që konsumoni dhe të kaluarën tuaj mjekësore. Kur lodhja zgjat me muaj Plogështia kronike nuk duhet ngatërruar pa të drejtë me sindromën e lodhjes kronike (ME/CFS). Sipas Qendrave për Kontrollin dhe Parandalimin e Sëmundjeve (CDC), për të vendosur një diagnozë të tillë të encefalomielitit mialgjik, kërkohet një rënie e ndjeshme e kapacitetit për të kryer aktivitete që zgjat përtej gjashtë muajve, lodhje që nuk largohet ndjeshëm përmes pushimit, gjumë jo rigjenerues dhe përkeqësim të simptomave pas përpjekjeve fizike apo intelektuale. Po ashtu, mund të shfaqen shqetësime në kujtesë, vështirësi në përqendrim ose marramendje gjatë ngritjes në këmbë. Megjithatë, fakti se dikush ndjehet i lodhur prej gjashtë muajsh nuk mjafton i vetëm për të përcaktuar këtë diagnozë. “Mjegulla e trurit” është një tjetër sinjal Plogështia e vazhdueshme shoqërohet shpesh me pengesa në fokusim, kujtesë më të brishtë dhe perceptimin se mendimet po rrjedhin më ngadalë. Këto dukuri mund të vërehen në një sërë gjendjesh shëndetësore dhe janë mjaft të pranishme edhe te sindroma ME/CFS. Në disa raste mund të konstatohen gjithashtu rrahje të shpejta të zemrës, marramendje, kokëdhimbje, luhatje emocionale apo dobësi muskulore. Pikërisht për shkak të gamës së gjerë të shkaqeve, vetëdiagnostikimi nuk përbën zgjidhje të sigurt. Kur duhet të drejtoheni te mjeku Nëse bëni gjumë të mjaftueshëm por vazhdoni të hapni sytë të rraskapitur për javë me radhë, ose nëse kjo gjendje po ju pengon mbarëvajtjen e punës dhe detyrave të përditshme, ka ardhur koha për një kontroll të specializuar mjekësor. Ndërkohë, gjumi cilësor, ushqyerja e ekuilibruar, lëvizja e përditshme dhe menaxhimi i niveleve të stresit mund të ndihmojnë në kapërcimin e lodhjes së zakonshme. Por nëse kjo dukuri nuk tërhiqet, mos u përpiqni ta mposhtni vetëm me filxhanë shtesë kafeje apo me më shumë vullnet. Sepse ndonjëherë lodhja nuk paraqet problemin kryesor – ajo është thjesht thirrja e fundit që trupi juaj po jep.