Eksperti Dominik Kanbach: Inteligjenca artificiale rrit shpejtësinë, por rrezikon të ulë cilësinë dhe të rëndojë ambientin

Gjatë punimeve të konferencës “PRIME”, e cila u zhvillua nën moton “Two Steps Forward and No Stepping Back”, eksperti i njohur Dominik Kanbach ka trajtuar sfidat e transformimit digjital, ndikimin e inteligjencës artificiale (AI) dhe nevojën urgjente për qëndrueshmëri në këtë fushë. Në fjalën e tij, Kanbach vuri në dukje se mjaft ndërmarrje vazhdojnë të çedojnë në mungesën e një vizioni të qartë mbi qëllimin e përdorimit të këtyre teknologjive të reja. Sipas tij, shpesh bizneset nuk e kuptojnë qartë se çfarë synojnë të realizojnë përmes mjeteve të inteligjencës artificiale. Duke iu referuar rasteve praktike në shkallë globale, ai theksoi se në qindra analiza nuk është konstatuar një korrelacion i drejtpërdrejtë mes nismave të AI-së dhe objektivave të qëndrueshmërisë. Për më tepër, ai tërhoqi vëmendjen te faturës mjedisore dhe rritja e hovshme e konsumit energjetik nga gjigantët e teknologjisë. Si ilustrim, Kanbach solli rastin e Google, duke përmendur se megjithëse energjia për një kërkesë të vetme në Gemini ka rënë ndjeshëm dhe emetimet janë përgjysmuar gjatë vitit të fundit, harxhimi i përgjithshëm i energjisë është rritur me 37 për qind për shkak të ngarkesës së inteligjencës artificiale. Për rrjedhojë, ai nënvizoi se procesi i digjitalizimit nuk mund të shkëputet nga sfidat reale ekologjike. Një tjetër pikë kyçe e diskutimit ishte ndikimi i AI në produktivitetin njerëzor. Kanbach u shpreh se megjithëse këto mjete përshpejtojnë punën, ato nuk garantojnë domosdoshmërisht një standard të lartë cilësor, duke shtuar se puna e gjeneruar nga inteligjenca artificiale mund të rezultojë dobët e projektuar dhe të ulë nivelin e përgjithshëm të prodhimit. Për të shmangur këtë grackë, ai sugjeroi edukimin e stafit në zhvillimin e mendimit kritik, në mënyrë që njerëzit të jenë të aftë të vlerësojnë dhe filtrojnë produktet e AI-së. Sipas tij, pikëpyetja më e madhe mbetet te kufiri i përfshirjes njerëzore në proceset vendimmarrëse. Në mbyllje të fjalës së tij, Dominik Kanbach bëri thirrje që bizneset të gjejnë pikën e duhur të ekuilibrit mes inovacionit digjital dhe përgjegjësisë mjedisore, duke e cilësuar mesazhin “Two Steps Forward and No Stepping Back” jo thjesht si një përshkrim të gjendjes, por si një detyrim moral për të ardhmen e përdorimit të teknologjisë.