Tensionet në Lindjen e Mesme: Pentagoni gati strategjinë e sulmit tre-ditor ndaj Iranit, dërgohen tri aeroplanmbajtëse

Departamenti i Mbrojtjes i Shteteve të Bashkuara ka përgatitur skenarin për një operacion ushtarak të shkurtër dhe intensiv tre-ditor kundër Iranit. Megjithatë, ky hap vjen në një kohë kur Presidenti Donald Trump ka deklaruar se Uashingtoni nuk do të ndërmarrë ndonjë sulm ushtarak para zgjedhjeve të mesmandatit të 3 nëntorit. Sipas burimeve zyrtare amerikane, ushtria e SHBA-së ka hartuar opsione konkrete për të shënjestruar arsenalin e dronëve dhe raketave iraniane, infrastrukturën energjetike, si dhe pika të rëndësishme ushtarake të Teheranit, në zbatim të udhëzimeve të dhëna nga kreu i Shtëpisë së Bardhë. Diskutimet rreth këtyre planeve u zhvilluan gjatë takimit të zyrtarëve të lartë të sigurisë kombëtare në Camp David, nën drejtimin e zëvendëspresidentit JD Vance. Alternativat e shqyrtuara parashikojnë një fushatë të rrufeshme që do të shtrihet në harkun kohor të tri ditëve. Fokusi kryesor i sulmeve të mundshme do të jetë mbi kapacitetet raketore dhe flotën e dronëve të Iranit. Një pjesë e madhe e këtij arsenali është rindërtuar nga Trupat e Gardës Revolucionare Islamike (IRGC) që nga faza e hershme e konfliktit, ndërsa në shënjestër pritet të vendosen edhe selitë komanduese të kësaj garde dhe komplekset energjetike. Paralelisht, autoritetet ushtarake kanë udhëzuar Komandën Qendrore të SHBA-së (CENTCOM) që të përmbyllë përgatitjet logjistike për një rikthim të mundshëm të operacioneve madhore luftarake kundër republikës islamike. Megjithëse direktiva nuk përcakton një afat kohor të saktë për nisjen e sulmeve dhe presidenti ende nuk ka marrë një vendim përfundimtar, planet përfshijnë gjithashtu bombardime në shkallë të gjerë kundër objektivave bërthamore, energjetike dhe strukturore. Përgatitjet në terren shoqërohen me deklaratat e Presidentit Trump, i cili konfirmoi se SHBA-ja nuk do ta sulmojë Iranin para zgjedhjeve të 3 nëntorit, duke përmendur gjithashtu vazhdimin e përpjekjeve diplomatike. Në një mesazh të publikuar në rrjetin social Truth Social, Trump bëri të ditur se Uashingtoni dhe Teherani janë përfshirë në bisedime që i cilësoi si “produktive”. Pavarësisht urdhrave të dhëna për përgatitjen e opsioneve ushtarake, kreu i shtetit amerikan ka hedhur poshtë disa herë gjatë muajve të fundit propozimet për nisjen e një konflikti të hapur. Në kuadër të këtyre lëvizjeve strategjike, tre aeroplanmbajtëse amerikane pritet të pozicionohen në rajonin e Lindjes së Mesme gjatë javëve në vijim, duke shënuar një intensifikim të pranisë ushtarake të SHBA-së.