Fuqizimi i vetëqeverisjes lokale: Përparim Rama pret në takim zyrtaren e lartë të Këshillit të Evropës, Claudia Luciani

Kryetari i Prishtinës, Përparim Rama, ka mirëpritur në Odën e Kryeqytetit drejtoreshën e Kongresit të Autoriteteve Lokale dhe Rajonale të Këshillit të Evropës, Claudia Luciani, në një takim të fokusuar tek zhvillimi dhe koordinimi lokal. Përmes një njoftimi në rrjetet sociale, Rama ka zbardhur temat e diskutimit, duke bërë të ditur se me zyrtaren e lartë evropiane ka biseduar mbi sfidat aktuale me të cilat përballen komunat, konsolidimin e demokracisë në nivel lokal, si dhe domosdoshmërinë për një partneritet më efikas mes pushtetit qendror dhe atij lokal. Gjatë këtij takimi, vëmendje e veçantë iu kushtua edhe mundësive të reja të financimit për projektet komunale nga mekanizmat ndërkombëtarë. "Po ashtu, theksuam rëndësinë që komunat të kenë qasje më të drejtpërdrejtë në fondet evropiane dhe ndërkombëtare. Kryeqyteti mbetet i përkushtuar ndaj fuqizimit të vetëqeverisjes lokale dhe bashkëpunimit me partnerët evropianë", ka deklaruar Rama.