Gruda sfidon Gjykatën Speciale: Ligji është kushtetues, do të gjejmë rrugën për ta zbatuar

Deputeti i Partisë Demokratike të Kosovës (PDK), Përparim Gruda, ka dalë në mbrojtje të nismës ligjore për ndryshimin e Ligjit për Gjykatën Speciale. Sipas tij, ky akt juridik është hartuar me përpikëri, duke mos rënë ndesh as me Kushtetutën e vendit dhe as me detyrimet ndërkombëtare të Kosovës. Në një reagim të bërë publik, Gruda ka shprehur skepticizëm rreth gatishmërisë së Gjykatës Speciale për ta respektuar këtë ndryshim ligjor. Ai ka theksuar se kjo gjykatë shpesh ka interpretuar ligjet dhe Kushtetutën sipas qasjes së saj, prandaj pret përpjekje për obstruksione. Megjithatë, ai u shpreh i bindur se institucionet e Kosovës do të gjejnë mekanizmat e nevojshëm juridikë për ta detyruar këtë institucion që t'i bindet ligjit të Republikës së Kosovës. "Jam i bindur se do të gjejmë rrugën juridike dhe institucionale për ta detyruar Gjykatën Speciale ta zbatojë ligjin e Republikës së Kosovës. Për këtë do të na duhet vendosmëri si shtet, si institucione dhe si shoqëri. Dhe do t’ia arrijmë", ka shkruar Gruda në platformën Facebook, duke shtuar se edhe në rast të një përplasjeje institucionale, Kosova duhet të mbrojë me çdo kusht ligjshmërinë e saj. Duke u ndalur në argumentet teknike, Gruda sqaroi se ndryshimi i ligjit nuk nënkupton ndryshim të Kushtetutës. Ai iu referua Amendamentit nr. 24, përkatësisht nenit 162 të Kushtetutës, i cili specifikon se funksionimi i Dhomave të Specializuara rregullohet me ligj të veçantë. Sipas tij, ligji i ri thjesht e precizon juridiksionin, duke ndarë kompetencat mes Dhomës Kushtetuese në Hagë dhe Gjykatës Kushtetuese në Prishtinë. Sipas versionit të ri të ligjit, Dhoma e Specializuar Kushtetuese në Hagë mbetet kompetente për të shqyrtuar vendimet dhe aktgjykimet e institucioneve të specializuara, por asaj i ndalohet shprehimisht të bëjë kontroll të kushtetutshmërisë së vetë ligjit. Kjo e drejtë, sipas Grudës, mbetet ekskluzive për Gjykatën Kushtetuese të Republikës së Kosovës në Prishtinë. Në fund, deputeti demokrat nënvizoi se argumenti është i thjeshtë: përderisa Kushtetuta parasheh që juridiksioni ushtrohet "në përputhje me ligjin e veçantë", atëherë ligji i ri është baza mbi të cilën ndahen këto kompetenca, pa cenuar aspak rendin kushtetues të shtetit.