Drejtësia për legjendën: Prokuroria kërkon 12 vjet burg për mjekun e Diego Maradonës

Prokurori Patricio Ferrari, i cili po drejton procesin gjyqësor për vdekjen e Diego Armando Maradonës, ka zyrtarizuar kërkesën për dënimin e neurokirurgut Leopoldo Luque me 12 vjet heqje lirie. Luque, i cili ishte në krye të ekipit mjekësor që mbikëqyrte gjendjen shëndetësore të ikonës së futbollit argjentinas, akuzohet si përgjegjësi kryesor për humbjen e jetës së 60-vjeçarit më 20 nëntor 2020. Sipas akuzës, neurokirurgu përballet me veprën penale të vrasjes me dashje të mundshme. Prokurori ka theksuar se rëndesa e këtij krimi shtohet për shkak të detyrës mjekësore që Luque mbante, si dhe lidhjes personale të miqësisë që ai kishte me pacientin e tij të famshëm. Në të njëjtën seancë, organi i akuzës ka kërkuar masa të tjera ndëshkimore për anëtarët e tjerë të stafit mjekësor. Për psikiatren Agustina Cosachov dhe koordinatoren e sigurimit shëndetësor 'Swiss Medical', Nancy Forlini, prokuroria ka kërkuar tetë vjet burgim, duke i konsideruar gjithashtu përgjegjëse për vrasje. Ndërkohë, për psikologun Carlos Diaz është kërkuar një dënim prej pesë vitesh, ndërsa infermierët Ricardo Almiron dhe Mariano Perroni përballen me një kërkesë për katër vjet burgim, pasi janë gjetur fajtorë për vrasje të paqëllimshme. Në anën tjetër, prokurori Ferrari ka kërkuar shfajësimin e plotë për mjekun Pedro Di Spagna. Sipas tij, Di Spagna ishte i vetmi që kishte vepruar konform protokolleve mjekësore dhe nuk kishte pasur autoritetin e nevojshëm për të ndikuar në vendimet lidhur me shtrimin në spital të Maradonës.