Haxhiu në përvjetorin e Gjermanisë: Lidhja jonë ka ngrohtësinë e kujtimeve familjare

Kryetarja e Kuvendit të Kosovës, Albulena Haxhiu, ka qenë e pranishme në pritjen festive të organizuar nga Ambasada e Gjermanisë në Kosovë, me rastin e shënimit të Ditës së Bashkimit të Gjermanisë. Gjatë fjalës së saj, ajo vuri në dukje se kjo datë simbolizon shpresën e një prej kthesave më të rëndësishme në historinë e kontinentit evropian, duke shtuar se bashkimi gjerman u dha mundësinë qytetarëve të ribashkoheshin pa barriera dhe të jetonin të lirë. “Për ne në Kosovë, miqësia me Gjermaninë ka edhe ngrohtësinë e kujtimeve familjare. Ajo ruhet në rrëfimet e njerëzve që gjetën atje një derë të hapur në kohët tona më të vështira, në mirënjohjen për ndihmën në rindërtimin e vendit dhe për mbështetjen e pavarësisë sonë”, ka shkruar Haxhiu, duke vlerësuar gjithashtu rolin e diasporës shqiptare në Gjermani për forcimin e urave lidhëse mes dy popujve. Krerët institucionalë dhe të pranishmit ndanë gjithashtu atmosferën e festës me gëzimin për zgjedhjen e Presidentes së re, Justina Shiroka-Pula, si dhe për perspektivën e sigurimit të stabilitetit institucional në vend. “Me krenari fola edhe për përfaqësimin e grave në drejtimin e shtetit tonë, një arritje që na ngarkon me përgjegjësinë për t’u hapur rrugë grave të tjera”, ka deklaruar ajo, duke shprehur njëherësh falënderimet e thella për mbështetjen e vazhdueshme që Berlini i jep Kosovës në procesin e integrimit evropian. “Gëzuar Ditën e Bashkimit të Gjermanisë! Uroj që afërsia ndërmjet njerëzve tanë të vazhdojë t’i japë forcë miqësisë ndërmjet dy shteteve tona”, ka përfunduar Haxhiu.