OVL e UÇK-së: Ndryshimet në Dhomat e Specializuara janë kthesë drejt drejtësisë së merituar

Organizata e Veteranëve të Luftës së UÇK-së ka dalë me një qëndrim zyrtar lidhur me polemikat e fundit rreth amendamenteve të miratuara nga Kuvendi i Kosovës për Ligjin e Dhomave të Specializuara, duke i cilësuar kritikat e deritanishme si të paplota dhe të ngutshme. Sipas komunikatës për media, reagimet kundërshtuese ndaj këtyre ndryshimeve ligjore nuk mbështeten në analiza serioze juridike. Organizata thekson se deri më tani mungon një studim profesional që do të dëshmonte se risitë ligjore janë të pazbatueshme apo në kundërshtim me përgjegjësitë ndërkombëtare të vendit. “Në vend të argumenteve juridike, opinioni publik është përballur kryesisht me polemika, interpretime të njëanshme dhe qëndrime politike, të cilat nuk mund të trajtohen si përfundime të pakontestueshme”, thuhet në reagim, teksa bëhet e qartë se debati nuk po zhvillohet në rrafshin e mirëfilltë profesional. Megjithëse refuzojnë të besojnë se pas këtyre kundërshtimeve qëndron ndonjë prapaskenë për të demoralizuar qytetarët që kanë kërkuar drejtësi, veteranët vlerësojnë se koha dhe mënyra e reagimeve lënë hapësirë për një përshtypje të tillë. Përfaqësuesit e luftës mbeten të bindur se ndryshimet e reja do ta kthejnë Gjykatën Speciale në shinat e duhura të ligjshmërisë. Organizata vëren se çdo vendim duhet të shihet përmes prismit të standardeve të mirëfillta të drejtësisë, ndërsa spekulimet e ndryshme për kinse pasoja juridike nuk mund të zëvendësojnë ekspertizën ligjore. “Kushdo që pretendon të kundërtën, ka përgjegjësinë ta argumentojë qëndrimin e vet me fakte, dispozita konkrete dhe arsyetim juridik, jo me deklarime politike”, shtohet tutje. Në këtë kontekst, OVL e UÇK-së ka rikujtuar se Kosova ka dëshmuar vazhdimisht gatishmëri për partneritet me drejtësinë ndërkombëtare, madje edhe kur janë marrë vendime tejet sfiduese. Megjithatë, ata nënvizojnë qartë se ky bashkëpunim nuk nënkupton heqjen dorë nga kërkesa për një proces të paanshëm, përgjegjësi institucionale dhe mbrojtje të dinjitetit të luftës çlirimtare. Në përmbyllje të reagimit, organizata kërkon që çdo diskutim i mëtejmë të orientohet nga argumentet profesionale dhe jo nga agjendat politike. “Shpresa e qytetarëve për drejtësi meriton përgjigje të argumentuara, jo përpjekje për ta relativizuar apo shuar atë”, përfundon deklarata.