Zhvillim i bujshëm në Britani: Gjykata shpall të paligjshme urdhër-kontrollet në banasat e ish-princit Andrew

Gjykata e Lartë në Mbretërinë e Bashkuar ka marrë një vendim të rëndësishëm lidhur me hetimin ndaj ish-princit Andrew Mountbatten-Windsor, pasi Policia e Thames Valley ka pranuar zyrtarisht se autorizimet për kontrollin e pronave të tij pas arrestimit në shkurt kanë qenë të paligjshme. Mountbatten-Windsor u prangos më 19 shkurt nën dyshimet për keqpërdorim të detyrës publike. Pasi i ka kundërshtuar në rrugë ligjore akuzat, ai nisi një betejë gjyqësore edhe për të kontestuar ligjshmërinë e kontrolleve që forcat e rendit kryen në pronat e tij. Gjatë atyre kontrolleve, autoritetet sekuestruan dokumente dhe pajisje elektronike, të cilat do të mbeten në duart e tyre të paktën deri në seancën e ardhshme të parashikuar për vitin 2027, ndërkohë që hetimi penal ndaj tij vijon normalisht. Në seancën e mbajtur në Gjykatën e Lartë, gjyqtari Hilliard bëri të ditur se palët kishin rënë dakord se urdhër-kontrollet kishin qenë të paligjshme. Megjithatë, ai sqaroi se ky zhvillim nuk e mbyll hetimin dhe as nuk e bën të pavlefshëm të gjithë procesin hetimor ndaj ish-princit. Klienti i drejtësisë kishte të bënte me mënyrën se si ishin siguruar këto urdhra. Policia fillimisht kishte kërkuar miratim mbështetur te seksionet 8 dhe 9 të Ligjit për Policinë dhe Provën Penale të vitit 1984. Edhe pse gjykata fillimisht i kishte lëshuar urdhrat sipas seksionit 8, një sfidë e mëvonshme juridike konfirmoi se duhej të ishin aplikuar dispozitat e seksionit 9. Nga ana e saj, Policia e Thames Valley pranoi se referimi fillestar i gjykatës mbi bazën ligjore të këtyre urdhrave kishte qenë i gabuar, çka solli edhe shfuqizimin e tyre. Pavarësisht kësaj, gjyqtari nënvizoi se policia ruan të drejtën t'i mbajë sendet e sekuestruara nëse ekziston një tjetër bazë e vlefshme ligjore që e autorizon një gjë të tillë. Për këtë arsye, materialet e konfiskuara nuk do t'i kthehen menjëherë në pronësi ish-princit. Problemet ligjore të Mountbatten-Windsor nisën pas publikimit të dokumenteve nga Departamenti Amerikan i Drejtësisë, të cilat sugjeronin se ai kishte ndarë të dhëna konfidenciale me Jeffrey Epstein, të dënuarin për krime seksuale, në periudhën kur mbante postin e të dërguarit tregtar britanik më 2010. Për këto pretendime, ish-princi ka mohuar vazhdimisht çdo lloj përfshirjeje apo shkeljeje. Nga Policia e Thames Valley kanë theksuar se anulimi i urdhër-kontrolleve nuk përbën një vendim mbi fajësinë apo themelin e çështjes, ndaj dhe hetimet për dyshimet rreth keqpërdorimit të detyrës publike mbeten të hapura. Autoritetet britanike bëjnë me dijenie se po shqyrtojnë çdo pistë të mundshme hetimore, ndërkohë që hapat e ardhshëm ligjorë do të vendosin nëse materialet e sekuestruara do të mund të përdoren ligjërisht për nevojat e hetimeve në vazhdim.