Këpucët në gozhdë? Luka Modriç thyen heshtjen për të ardhmen dhe planet pas pensionimit

Nga njëra anë është dëshira e pandalur për të shkelur fushat e blerta për sa kohë fiziku i përgjigjet pritshmërive, ndërsa nga ana tjetër duket nevoja e pashmangshme për të hedhur sytë nga e ardhmja kur të vijë momenti i lamtumirës përfundimtare. Pavarësisht formës së shkëlqyer që gëzon, dita kur maestro kroat do t'i japë fund karrierës si futbollist aktiv po afron gradualisht. Sa i përket kohës së saktë të tërheqjes, kapiteni i Kroacisë ka hedhur dritë mbi planet e tij pas përfundimit të sfidës kundër Spanjës, e cila shënoi edhe mbylljen e këtij cikli të Ligës së Kombeve. Në një deklaratë për “Cadena Cope”, Modriç u shpreh: “Ndjehem mirë, kam ende pasionin, ambicien dhe forcat. Dhe për sa kohë që do të ndihem kështu, dua të vazhdoj të luaj”. “Sa do të zgjasë në këtë moshë? Nuk mund ta them. Mund të jenë dy muaj, tre muaj, gjashtë muaj, një vit, dy vite… Nuk e di. Nuk dua të jap një përgjigje tani dhe më pas të pendohem. Do të shkoj hap pas hapi, ndeshje pas ndeshjeje, muaj pas muaji, duke dëgjuar trupin tim dhe duke parë se si ndihem. Më pas do të vendos me qetësi të plotë”, vijoi ai. “Do të shohim sa do të zgjasë. Nëse ky do të jetë viti im i fundit në futboll apo nëse do të vazhdoj edhe më tej, nuk e di. Por mund t’ju them se ndihem mirë dhe po e shijoj ende”, shtoi mesfushori, fjalë që kanë sjellë entuziazëm të madh te mbështetësit e Milanit. Duke iu përgjigjur zërave për një rikthim të mundshëm te Real Madridi në një rol drejtues, opsion ky që qarkulloi gjatë merkatos së verës, Modriç theksoi: “Do të më pëlqente, por dua të jem i dobishëm dhe të punoj për Madridin, jo brenda Madridit. Duhet të përputhen shumë gjëra që unë të mund të rikthehem”. Për momentin, fokusi kryesor i veteranit mbetet i përqendruar te një mision madhor: rikthimi i Milanit në elitën e Ligës së Kampionëve.