Beteja ligjore: Gjykata e Apelit i jep përfundimisht të drejtë gjyqtares Mejreme Memaj për anëtarësinë në KGJK

Gjykata e Apelit ka marrë vendim përfundimtar duke lënë në fuqi aktgjykimin e Gjykatës Themelore në Prishtinë, i cili kishte zhvlerësuar raundin e dytë të zgjedhjeve për anëtarë të Këshillit Gjyqësor të Kosovës (KGJK). Njëkohësisht, Apeli ka urdhëruar certifikimin e rezultateve të raundit të parë, duke konfirmuar fitoren e Mejreme Memajt dhe Rrustem Thaçit. Vendimi zyrtar u mor më 21 shtator 2026 nga trupi gjykues i përbërë nga kryetari i kolegjit, Hajriz Hoti, si dhe anëtarët Arsim Hamzaj dhe Mehmet Ndrecaj. Kjo çështje i referohet procesit zgjedhor të zhvilluar më 23 janar 2026, ku morën pjesë 34 nga 35 gjyqtarë të Gjykatës Supreme për të plotësuar dy pozita në Këshill. Në raundin e parë të votimit, nga 34 fletëvotime gjithsej, 33 rezultuan të vlefshme dhe vetëm një i pavlefshëm. Kandidatët Mejreme Memaj dhe Rrustem Thaçi siguruan nga 17 vota secili, ndërsa Bashkim Hyseni dhe Franciska Zhitia-Ymeri morën nga 16 vota. Megjithatë, komisioni zgjedhor pat konkluduar se asnjëri prej garuesve nuk kishte arritur shumicën e kërkuar, duke hapur rrugën për një raund të dytë votimi. Në këtë raund të përsëritur, Rrustem Thaçi dhe Franciska Zhitia-Ymeri morën nga 19 vota, kurse Mejreme Memaj dhe Bashkim Hyseni siguruan nga 15 vota. Pas këtij zhvillimi, KGJK kishte certifikuar zyrtarisht Thaçin dhe Zhitia-Ymerin si anëtarë të rinj. Pas kësaj situate, Gjykata Themelore në Prishtinë kishte aprovuar padinë e gjyqtares Mejreme Memaj në konfliktin administrativ kundër Këshillit Gjyqësor. Në kundërshtim të këtij vendimi, Këshilli Gjyqësor i Kosovës kishte ushtruar ankesë, duke kërkuar shfuqizimin e aktgjykimit dhe rrëzimin e kërkesëpadisë. Ankesë të ngjashme kishte dorëzuar edhe pala e interesuar, gjykatësja Franciska Zhitia-Ymeri, përmes avokatit të saj Engjëll Rexhepi, duke kërkuar gjithashtu prishjen e vendimit dhe refuzimin e padisë. Në anën tjetër, mbrojtësi i Mejreme Memajt, avokati Besnik Berisha, kishte dorëzuar përgjigjen në ankesë, duke i propozuar Gjykatës së Apelit që të hedhë poshtë të dyja ankesat dhe të lërë në fuqi vendimin e shkallës së parë. Sa i takon gjetjeve dhe vlerësimit të Gjykatës së Apelit, në aktgjykim theksohet se arsyetimi i shkallës së parë është plotësisht i rregullt, i mbështetur në ligj dhe se kolegji i Apelit e adhuron në tërësi atë qëndrim juridik. Apeli ka vlerësuar se vendimi nuk përmban shkelje esenciale të procedurës, pasi padia ishte përcjellë fillimisht për përgjigje në KGJK dhe tek pala e interesuar, për t'u caktuar më pas seanca dhe administruar provat e nevojshme. Sipas këtij institucioni gjyqësor, vendimi është i qartë, i kuptueshëm dhe përmban argumente të mjaftueshme për faktet vendimtare, duke qenë plotësisht në përputhje me nenin 160 të Ligjit për Procedurën Kontestimore. Po ashtu, Apeli ka rrëzuar pretendimet për shkelje thelbësore, duke sqaruar se rasti është gjykuar në suazat e kërkesëpadisë dhe pa shënuar asnjë tejkalim të saj. Gjykata ka gjetur gjithashtu se, përveç kërkesës për anulimin e vendimeve të KGJK-së që shpallnin fituese Zhitia-Ymerin, në kërkesëpadisë është kërkuar edhe konstatimi se raundi i parë ishte i rregullt, ku fitues dolën gjyqtarët Rrustem Thaçi dhe Mejreme Memaj. Sipas Apelit, objekti i kërkesëpadisë nuk ka pësuar ndonjë ndryshim. Fakti që shkalla e parë, në vend të zëvendësimit të drejtpërdrejtë të aktit administrativ, ka përcaktuar mënyrën se si duhet të realizohen pasojat juridike përmes veprimit të organit kompetent siç është KGJK-ja, nuk paraqet ndryshim të objektit, por përbën formë të dhënies së mbrojtjes efektive gjyqësore.