Efikasiteti energjetik në fokus: Gjimnazistët e Prishtinës mësojnë artin e kursimit për një të ardhme më të gjelbër

Nxënësit e Gjimnazit “Eqrem Çabej” në Prishtinë janë bërë pjesë e një aktiviteti ndërgjegjësues, i cili u zhvillua në kuadër të nismës “Energjia në Duart Tona”. Ky projekt ka për qëllim kryesor informimin e brezit të ri rreth vlerës së kursimit të energjisë elektrike, si dhe pasojave që sjell konsumi i tepërt dhe i panevojshëm si në buxhetin familjar, ashtu edhe në mjedisin tonë jetësor. Gjatë këtij takimi, vëmendja e veçantë iu kushtua shfrytëzimit me përgjegjësi të rrymës dhe metodave praktike se si racionalizimi i saj mund të shndërrohet në një shprehi të përditshme për secilin prej nesh. Pjesëmarrësit patën rastin të njihen me hapa konkretë që mund t'i aplikojnë menjëherë në shtëpitë e tyre, ndërkohë që shumë prej tyre pranuan se këshillat e ndara ishin risi për ta. Mimoza Gaçuri, nxënëse e klasës së 12-të, theksoi se kjo ligjëratë i ka pasuruar me njohuri shtesë për një çështje që lidhet ngushtë me të ardhmen e tyre dhe përgjegjësinë që do të mbajnë nesër si shtylla të familjeve të reja. “Ligjërata qe shumë e mirë. I kemi pasur disa informacione, po këta na dhanë edhe më shumë informacione. Na mësuan për të ardhmen tonë, të cilën kemi me u bë si bazë e familjes. Na treguan që mos me shpenzuar shumë energji për shkak që do të na bëjë dëm në xhepin tonë edhe në shtetin tonë”, u shpreh ajo, duke shtuar se një nga aspektet më domethënëse ishte edhe obligimi moral për t'i përcjellë këto mesazhe te rrethi i gjerë dhe te moshatarët e tjerë. Një perspektivë të ngjashme ndau edhe nxënësi i klasës së 12-të, Blend Behluli, i cili vuri inxhinierikisht në pah se menaxhimi i mirë i energjisë shkon përtej përfitimit financiar. “Sot në ligjëratën e sotme mësuam se kur kursejmë energji, nuk ruajmë vetëm para, po i ndihmojmë edhe për mbrojtjen e ajrit, mjedisit dhe të ardhmes sonë për shembull. Sa më pak energji të harxhojmë pa nevojë, aq më shumë kujdesemi për planetin ku jetojmë ne”, deklaroi ai. Ndërkaq, Alea Veliu, nxënëse e paraleles 10/2, e vlerësoi lart këtë organizim si një hap kyç drejt ngritjes së vetëdijes kolektive. “Ligjërata ka qenë shumë e rëndësishme për vetëdijesimin tonë se si me kursyer energjinë elektrike, qysh me i përdorur ato në mënyrë efikase”, u shpreh ajo. Po ashtu, Orgesa Gubetini, nxënëse e klasës 11/1 në programin gjerman, solli në vëmendje fuqinë që kanë gjestet e vogla individuale në planin e gjerë kombëtar dhe mjedisor. “Ligjërata për ne nxënësve qe shumë edukative, që na ndihmon që çdo arsyetim i vogël ose çdo punë e vogël e jona që e bëjmë në shtëpinë tonë, çdo veprim, mundet me na ndihmuar në kursimin e energjisë elektrike për shtetin tonë, për popullin, me na ndihmuar në çdo aspekt”, tha ajo. Projekti “Energjia në duart tona” po implementohet nga Qendra për Inovacione dhe Zhvillim, në bashkëpunim me Agjencinë e Lajmeve KosovaPress dhe Korporatën Energjetike të Kosovës (KEK). Ky angazhim i përbashkët synon fuqizimin e ndërgjegjes qytetare që nga bankat e shkollës, duke krijuar një kulturë të re të qëndrueshmërisë dhe kursimit në mbarë shoqërinë.