Publikuar më: Mërgimtari Tahir Racaj ka reaguar ashpër në rrjetet sociale pas publikimit të raportit të organizatës “Reporterët pa Kufij”, sipas të cilit Kosova renditet e fundit në rajon për lirinë e medias. Racaj, i cili jeton dhe vepron jashtë Kosovës, ka shfrytëzuar një postim të deputetit Armend Muja për të shprehur pakënaqësinë e tij. Në komentin e tij, ai ka ofenduar kryeprokurorin e përkohshëm Blerim Isufaj, duke përdorur gjuhë të rëndë dhe fyese, e duke e cilësuar atë si “kondom të oligarkëve” dhe “zagar e jaran me Radojçiqin”. Postimi i Racajt pasoi publikimin e disa dokumenteve lidhur me kompaninë Art Motion nga deputeti Muja. Në vend që të fokusohej në përmbajtjen e dokumenteve, Racaj zgjodhi të shënjestrojë personalisht kryeprokurorin Isufaj. Ndryshe Blerim Isufaj, i lindur më 1 nëntor 1968 në Junik, ishte pjesëtar i Ushtrisë Çlirimtare të Kosovës gjatë luftës, pjesë e Brigadës së Agim Ramadanit. Pas përfundimit të luftës, ai ka ndjekur një karrierë në sistemin e drejtësisë, fillimisht si jurist-praktikant dhe më pas si bashkëpunëtor profesional në Prokurorinë e Qarkut në Pejë. Më vonë, ka shërbyer edhe si këshilltar juridik i ish-Ministres së Drejtësisë, të ndjerës Nekibe Kelmendi.