Gjykata shpall të pafajshëm Alban Bibajn, i akuzuar për nxitje të urrejtjes dhe thirrje për xhihad

Gjykata Themelore në Prishtinë ka marrë vendim për lirimin nga akuzat të Alban Bibajt, i cili ngarkohej zyrtarisht me veprën penale “Nxitje e përçarjes dhe mosdurimit”. Vendimi është shpallur nga trupi gjykues i kryesuar nga gjyqtari Kushtrim Shyti, së bashku me anëtarët Avni Syla dhe Donikë Shala-Abdyli. Gjatë seancës, kryetari i trupit gjykues theksoi se pas shqyrtimit të të gjitha provave materiale dhe personale, nuk është arritur të vërtetohet se i pandehuri ka kryer veprën për të cilën akuzohej. Palët e pakënaqura me këtë vendim kanë të drejtë ankese brenda afatit ligjor prej 30 ditësh, nga momenti i pranimit të aktgjykimit në formë të shkruar. Ndërkaq, të gjitha shpenzimet e procedurës gjyqësore do të mbulohen nga buxheti i gjykatës. Në seancën e shpalljes së aktgjykimit ishin të pranishëm i akuzuari Alban Bibaj dhe mbrojtësi i tij, avokati Blerim Bajrami. Në seancën fillestare të mbajtur më 21 gusht 2025, Bibaj ishte deklaruar plotësisht i pafajshëm për akuzat ndaj tij. Sipas aktakuzës së ngritur nga Prokuroria Speciale e Republikës së Kosovës më 13 gusht 2025, ai akuzohej se përmes profileve të tij kishte nxitur urrejtje fetare dhe kishte shpërndarë ideologji ekstreme. Sipas prokurorisë, nga viti 2019 deri në maj të vitit 2025, përmes rrjetit social Facebook nën emrin “Ubejdullah Abu Suhejla”, ai dyshohej se kishte bërë thirrje për t'iu bashkuar luftërave të armatosura, kishte përkrahur organizatën “ISIS”, si dhe kishte bërë thirrje për refuzimin e sistemit demokratik dhe ligjeve shtetërore në favor të atyre të “Sheriatit”. Po ashtu, në aktakuzë pretendohej se i pandehuri kishte publikuar simbole, fotografi, materiale propagandistike dhe video të personave të radikalizuar që mund të rrezikonin rendin publik, duke u ngarkuar kështu me veprën penale të nxitjes së përçarjes dhe mosdurimit sipas Kodit Penal.