Nisja e shkëlqyer te Barcelona, Anthony Gordon zbulon synimin e madh: Jam i bindur se do të shënoj shumë gola

Vetëm tetë ndeshje dhe pesë asiste kanë mjaftuar që Anthony Gordon të integrohet plotësisht te Barcelona, pas kalimit të tij gjatë afatit kalimtar të verës nga rreshtat e Newcastle. Sidoqoftë, në një rrëfim për revistën zyrtare të klubit katalunas, sulmuesi anësor anglez ka vënë në dukje aspektin që kërkon ende përmirësim në paraqitjet e tij. “Më mundon goli. Nuk kam pasur ende shumë raste për të shënuar. Në fakt, kjo është diçka që ka ndodhur gjatë gjithë karrierës sime. Në çdo klub dhe në çdo fazë, më është dashur pak kohë para se të filloja të shënoja rregullisht. Por jam i bindur se do të shënoj shumë gola”, u shpreh futbollisti nga Ishujt Britanikë. Pavarësisht kësaj, pritja e ngrohtë dhe mbështetja e menjëhershme nga mbështetësit e klubit kanë përbërë një befasi të këndshme për të: “Këta tifozë kanë admiruar Messi, Luis Suárez, Ronaldinho dhe shumë nga lojtarët më të mirë në histori. Nuk e prisja të ndihesha kaq i vlerësuar që në fillim. Kur firmosa nuk e besoja se ishte e vërtetë sepse ishte diçka që e kisha ëndërruar që kur isha shumë i vogël”. Në procesin e përshtatjes së tij një kontribut të çmuar kanë dhënë Eric Garcia dhe Dani Olmo, ndërsa Gordon ka ndarë lëvdata të veçanta për bashkëlojtarin e tij, Pedri: “Gjatë karrierës sime, kam bërë shumë vrapime që askush nuk i shihte, por tani kam Pedri, i cili sheh absolutisht gjithçka.” Talenti anglez është mahnitur gjithashtu nga dimensioni njerëzor dhe profesional brenda skuadrës: “Është klubi më i mirë në botë, me disa nga lojtarët më të mirë, e megjithatë të gjithë janë shumë modestë. Jemi shumë ambiciozë dhe duam të fitojmë gjithçka, por nuk do të dëgjoni kurrë dikë të mburret së tepërmi.” Në mbyllje të prononcimit të tij, duke bërë një bilanc të figurave drejtuese me të cilat ka bashkëpunuar ndër vite, ai ka veçuar trajnerin aktual të Barcelonës, Hansi Flick: “Ai më dha mundësinë të luaja në një skenë të jashtëzakonshme, të lidhesha me tifozët dhe të përjetoja gjithçka që kisha ëndërruar gjithmonë.”