Prapaskenat e Topit të Artë: Ish-drejtuesi i ‘France Football’ rrëfen tentativën me zarf

Pascal Ferre, ish-kryeredaktori i revistës së njohur “France Football” dhe një ndër emrat kyç në organizimin e ndarjes së çmimit prestigjioz “Topi i Artë”, ka bërë publike një ngjarje të pazakontë nga periudha kur drejtonte këtë institucion. Ai ka pranon se është përballur me një përpjekje të hapur për të manipuluar procesin e vendimmarrjes gjatë mandatit të tij. Gjatë një rrëfimi për të përditshmen spanjolle “Marca”, Ferre ka shpjeguar se një menaxher lojtarësh i kishte ofruar një formë ryshfeti, me qëllim që të ndikonte te votuesit në favor të klientit të tij që garonte për trofeun e lakmuar. “Po, është plotësisht e vërtetë. Një agjent kërkoi një takim me mua, pasi lojtari i tij ishte në listën e të nominuarve. Pasi theksoi arritjet e tij dhe e lavdëroi gjatë, ai më bëri të qartë nëse do të mundja, – po e citoj në thonjëza – ‘ta shisja’ kandidaturën e tij para jurisë”, ka relatuar Ferre. Ish-kreu i redaksisë së “France Football”, i cili ka shërbyer në këtë detyrë për rreth tri dekada, theksoi se e refuzoi menjëherë kërkesën e pabazuar dhe refuzoi çdo lloj ndërhyrjeje në zgjedhjen e fituesit. “Në një moment u detyrova të ngrihesha nga tavolina për t'i dhënë përgjigje një thirrjeje telefonike. Kur u ktheva, përfaqësuesi i lojtarit ishte larguar”, vijon rrëfimi i tij. “Megjithatë, mbi tavolinë kishte mbetur një zarf. E mora dhe e dorëzova menjëherë në recepsion. Nuk kam asnjë ide se çfarë mund të ketë pasur brenda”, u shpreh ai. Në dëshminë e tij, Ferre ka preferuar të mos përmendë vitin se kur ka ndodhur ky incident, duke ruajtur gjithashtu anonimatin e agjentit dhe futbollistit që lidhen me këtë skandal.