Kurti takon presidenten e re, Shiroka-Pula: S’ka kohë për humbje, na presin sfida madhore shtetërore

Kryeministri i Kosovës, Albin Kurti, ka zhvilluar një takim zyrtar me presidenten e re të vendit, Justina Shiroka-Pula, në ambientet e Presidencës. Pas përfundimit të takimit, kreu i ekzekutivit bëri të ditur se është pritur me ngrohtësi nga e para e shtetit, ndërkohë që palët janë zotuar për një bashkim forcash në shërbim të interesit publik dhe shtetëror. Kurti tregoi se e ka falënderuar përzemërsisht Shiroka-Pulën për pranimin e kandidaturës dhe zgjedhjen e saj në krye të shtetit, duke vënë theksin te nevoja e koordinimit institucional për t'i bërë ballë sfidave që e presin vendin në vijim. “Republika e Kosovës më në fund, pas më shumë se një viti e gjysmë, ka institucione plotësisht funksionale dhe më nuk kemi kohë për të humbur. Duhet të bëhemi bashkë për shumë sfida shtetërore që i kemi përpara”, u shpreh ndër të tjera kryeministri Kurti. Ai gjithashtu bëri të me dije se gjatë bisedimeve ka hasur në mirëkuptim të plotë, gatishmëri dhe vullnet të ndërsjellë për të bashkëpunuar ngushtë në çdo drejtim. “Duhet të jemi të shpejtë në sukseset që na presin, në fitoret në të ardhmen, që janë njëkohësisht edhe shpresë e pritje e qytetarëve të Kosovës”, përfundoi Kurti.