Ambasadori Hargreaves: Kosovë-Britani, koha për një kapitull të ri të orientuar nga ekonomia dhe investimet

Ambasadori i Mbretërisë së Bashkuar në Kosovë, Jonathan Hargreaves, ka përgëzuar vendin për zgjedhjen e presidentes së re, duke e cilësuar këtë zhvillim si një shans ideal për një fillim të mbarë dhe një periudhë transformuese për shtetin. Gjatë një tubimi me figura të shquara të sipërmarrjes, investitorë dhe personalitete institucionale, diplomati britanik nënvizoi se Kosova duhet t'i forcojë lidhjet me fqinjët evropianë dhe strukturat euroatlantike, duke shtrirë bashkëpunimin përtej politikës dhe sigurisë, drejt një integrimi të fuqishëm ekonomik. “Dhe më lejoni ta nis, kryeministër, duke e uruar Kosovën për zgjedhjen e presidentes së re. Jo vetëm për faktin se, me sa di unë, kjo është presidentja e tretë ose, sipas disa përllogaritjeve, e katërta grua që ka pasur Kosova. Pra, me sa di unë, ky është një rekord. Dhe kjo është gjithashtu një shembull fantastik për pjesën tjetër të botës. Por kjo është edhe një mundësi e jashtëzakonshme për një fillim të ri, një epokë të re në zhvillimin e Kosovës, të lidhur edhe më vendosmërisht, në aspektin ekonomik, politik dhe të sigurisë, me fqinjët tuaj evropianë dhe me institucionet euroatlantike”, u shpreh Hargreaves gjatë fjalës së tij. Kreu i diplomonisë britanike në Prishtinë vuri në dukje rëndësinë e këtij takimi ku u bashkuan drejtues ndërmarrjesh, investitorë, përfaqësues qeveritarë dhe miq të ngushtë të Kosovës nga Britania e Madhe dhe rajoni, ndërsa veçoi kontributin e çmuar të diasporës shqiptare në Mbretërinë e Bashkuar si një urë lidhëse mes dy shoqërive. “Kur njerëzit mendojnë për marrëdhëniet mes Mbretërisë së Bashkuar dhe Kosovës, guxoj të them se shpesh mendojnë fillimisht për sigurinë, politikën apo diplomacinë, dhe kjo është e kuptueshme. Sepse ne në Mbretërinë e Bashkuar jemi krenarë që kemi qëndruar përkrah Kosovës në momentet më të rëndësishme të historisë së saj. Dhe shumë kosovarë, përfshirë padyshim shumë prej jush që jeni këtu sot, kanë kujtime familjare për atë mbështetje dhe atë partneritet ndër vite”, shtoi ai. Duke vijuar fjalën, ambasadori theksoi se miqësia tradicionale mes dy shteteve nuk mund të mbështetet vetëm te e kaluara historike, por kërkon ushqim dhe zhvillim të vazhdueshëm përmes nismave të përbashkëta ekonomike dhe tregtare. “Por, sigurisht, siç e dimë të gjithë, marrëdhëniet e mëdha nuk mund të mbështeten vetëm në histori. Ato vazhdojnë të zhvillohen dhe ushqehen nga e ardhmja. Dhe mendoj se jemi këtu sot sepse besojmë se kapitulli i ardhshëm i marrëdhënieve mes Mbretërisë së Bashkuar dhe Kosovës duhet dhe do të jetë gjithnjë e më shumë i përqendruar te biznesi, investimet, inovacioni dhe prosperiteti i përbashkët për të dy popujt tanë”, deklaroi Hargreaves. Gjatë fjalimit të tij, ai i kushtoi një rëndësi të veçantë komunitetit shqiptar në Britani, duke përmendur rrugëtimin e tyre sfidues dhe sukseset e arritur ndër vite në fusha të ndryshme të jetës publike dhe profesionale. “Diaspora kosovare në Mbretërinë e Bashkuar, e cila shpesh gjendet edhe këtu, përfshirë edhe sot, ka kontribuar dhe vazhdon të kontribuojë jashtëzakonisht shumë për të dyja vendet tona. Shumë prej tyre mbërritën në Mbretërinë e Bashkuar gjatë viteve të vështira dhe ndërtuan biznese, karriera dhe komunitete. Ata dhe fëmijët e tyre janë bërë sipërmarrës, inxhinierë, akademikë, mjekë, artistë, drejtues biznesesh, politikanë, e disa madje janë bërë edhe superyje me famë botërore”, u shpreh ai. Në mbyllje, ambasadori britanik vlerësoi se pjesëtarët e diasporës janë shndërruar në aktorë kryesorë për integrimin e Kosovës në tregjet ndërkombëtare, duke kontribuar drejtpërdrejt me kapital, kohë dhe ekspertizë profesionale në vendlindje.