Kur xhelozia kthehet në rrezik për çiftin: Psikiatri Burim Meta tregon kur duhet ndërhyrja e specialistit

Fenomeni i xhelozisë mund të shndërrohet në një burim shqetësimi me përmasa të mëdha për individin, familjen dhe shoqërinë në tërësi, ndërsa në situata të caktuara kërkon domosdoshmërisht ndërhyrjen e profesionistëve të shëndetit mendor. Këto janë detajet që ka ndarë psikiatri Burim Meta gjatë një diskutimi televiziv kushtuar dinamikave të marrëdhënieve në çift, ku ka analizuar rrënjët dhe pasojat e këtij emocioni. Sipas ekspertit të fushës, sjelljet xheloze zakonisht e kanë zanafillën te pasiguritë e thella personale, të cilat më vonë shfaqen hapur në komunikimin dhe raportin me partnerin e jetës. I pyetur nëse ky shqetësim ka nevojë për trajtim mjekësor apo psikologjik, doktori ka dhënë një përgjigje pohuese, duke vënë në pah dëmet e rënda që mund t'i shkaktohen lidhjes bashkëshortore. "Absolutisht po. Xhelozia është një koncept që sjell pasoja tejet të rënda, si në rrafshin personal ashtu edhe në atë shoqëror, sidomos kur shfaqet e theksuar ndaj bashkëshortes. Këto janë problematika madhore familjare dhe sociale. Në themel të saj qëndron një pasiguri e brendshme; boshllëqe të pambuluara që nga fëmijëria e hershme e bëjnë njeriun të pasigurt dhe këtë pasiguri ai e derdh te xhelozia, veçanërisht ndaj atij që e do më shumë dhe dëshiron ta ketë pronë të vetën, çka në fund prodhon konflikte të vazhdueshme", u shpreh Meta.