Çështja e Vlora Hysenit: Brukseli shpreh besim të plotë te SPAK, por refuzon të komentojë hetimet në ecje

Bashkimi Europian ka shmangur një koment direkt lidhur me hetimet ndaj ish-drejtueses së SHISH, Vlora Hyseni, e cila ndodhet nën masën e sigurisë “arrest në shtëpi”, por nga Brukseli ka përcjellë një mesazh mbështetjeje për Strukturën e Posaçme Kundër Korrupsionit dhe Krimit të Organizuar (SPAK). Zëdhënësi i Komisionit Europian për zgjerimin, Guillaume Mercier, deklaroi se institucioni që ai përfaqëson nuk ka zakon të japë vlerësime për çështje që ndodhen aktualisht në proces gjyqësor apo hetimor. Megjithatë, ai theksoi se zhvillimet që lidhen me shtetin e së drejtës dhe reformat në drejtësi ndiqen me vëmendje të lartë. “Ne nuk komentojmë çështje që janë në proces, por ajo që mund të themi është se ne i ndjekim nga afër zhvillimet që lidhen me shtetin e së drejtës, veçanërisht reformat në drejtësi dhe luftën kundër krimit të organizuar dhe korrupsionit, fusha në të cilat Shqipëria ka bërë përparim të konsiderueshëm”, u shpreh Mercier. Në vijim të deklaratës së tij, zëdhënësi i KE-së përsëriti mbështetjen e pakushtëzuar për organin e akuzës, duke vënë në dukje se institucioni gëzon besim të plotë për të çuar deri në fund hetimet ndaj fenomeneve kriminale. “Kemi besim të plotë tek aftësia e Strukturës së Posaçme Kundër Korrupsionit dhe Krimit të Organizuar, e njohur si SPAK, për të zbuluar, hetuar dhe ndjekur penalisht krimin e organizuar”, shtoi ai. Edhe pse BE-ja nuk mori një qëndrim zyrtar mbi provat e dosjes apo fajësinë e mundshme të Vlora Hysenit, qëndrimi institucional mbetet i fokusuar te mbështetja e pandërprerë për punën e prokurorisë së posaçme shqiptare. Në fund, Mercier bëri me dije se komunikimi mes zyrtarëve europianë dhe autoriteteve në Tiranë mbetet i vazhdueshëm dhe se palët vijojnë kontaktet e rregullta në kuadër të bashkëpunimit institucional.