Skandali i spiunazhit: Softueri rus që depërtoi në agjencitë e sigurisë së SHBA-së dhe në laptopin e Hunter Bidenit

Më 15 tetor 2024, në një sallë hoteli në Aleksandri të Virxhinias, fare pranë Uashingtonit, një ish-pjesëtar i Shërbimit Sekret amerikan mbajti një prezantim të rëndësishëm përpara një grupi ekspertësh të teknologjisë. Ai po promovonte një program kompjuterik jashtëzakonisht të fuqishëm për ndërhyrje dhe analizë të dhënash. Ky program, i krijuar nga kompania "Oxygen Forensics", ka aftësinë të nxjerrë skedarë dhe dokumente nga telefonat celularë, kompjuterët dhe pajisje të tjera digjitale, duke thyer madje edhe sistemet më të sigurta të enkriptimit të fjalëkalimeve. Ky mjet përdoret gjerësisht nga institucionet më të larta të sigurisë në SHBA, duke përfshirë Departamentin e Mbrojtjes, Shërbimin Sekret, Departamentin e Sigurisë Kombëtare, FBI-në, si dhe nga dhjetëra agjenci të tjera ligjzbatuese në Amerikë dhe Evropë. Në një video të këtij prezantimi, të bërë publike nga mediat, ish-agjenti Konstantinos “Gus” Dimitrelos dëgjohet duke thurur lavde për kapacitetet e jashtëzakonshme të softuerit "Oxygen". Si shembull konkret të suksesit të tij, ai u mburr se e kishte përdorur këtë program për të rikuperuar dhjetëra mijëra dokumente nga një kopje e hard-diskut të laptopit që i përkiste Hunter Bidenit, djalit të presidentit të atëhershëm amerikan, Joe Biden. “Oxygen është mjeti im kryesor. Është i vetmi program që përdor dhe i vetmi që u mësoj të tjerëve. E adhuroj këtë softuer”, deklaroi Dimitrelos gjatë prezantimit. Ai shpjegoi se arsyeja kryesore pse e vlerëson kaq shumë është aftësia për të kryer autentifikimin dhe rikuperimin e saktë të të dhënave nga ai laptop. Gjatë fjalës së tij, ai tregoi edhe momentin kur u kontaktua për këtë çështje: “Disa vite më parë mora një telefonatë ku më thanë se kishin një laptop. Kur pyeta se i kujt ishte, më njoftuan se bëhej fjalë për laptopin e Hunter Bidenit.” Dimitrelos i referohej një prej ngjarjeve më të bujshme që tronditi skenën politike në Shtetet e Bashkuara gjatë fushatës presidenciale të vitit 2020, garë kjo ku Joe Biden mposhti presidentin e atëhershëm Donald Trump. Megjithatë, situata mori një kthesë dramatike më 23 shtator 2026, kur Departamenti i Drejtësisë i SHBA-së njoftoi ngritjen e akuzave zyrtare ndaj dy drejtuesve të lartë të "Oxygen". Ata dyshohen se kanë gënjyer autoritetet lidhur me pronësinë e vërtetë dhe kontrollin real mbi këtë kompani. Sipas hetimeve të kryera nga organet federale amerikane, u zbulua se "Oxygen Forensics" në të vërtetë zotërohet dhe kontrollohet plotësisht nga Rusia. Dëshmia e Dimitrelosit nxjerr në dritë shtrirjen e gjerë që ky softuer ka pasur në mesin e ekspertëve të forenzikës digjitale dhe agjencive të inteligjencës në mbarë botën. Akuzat e fundit penale për fshehjen e pronësisë ruse kanë ngritur alarme të mëdha mbi sigurinë e të dhënave dhe mundësinë e keqpërdorimit të këtij programi nga shërbimet e huaja të spiunazhit. Dimitrelos, i cili nuk iu përgjigj kërkesave për koment përmes postës elektronike, ishte angazhuar nga gazeta "Washington Examiner" për të verifikuar vërtetësinë e hard-diskut të Bidenit. Megjithëse FBI-ja dhe ekspertë të tjerë të jashtëm të angazhuar nga "Washington Post" kishin konfirmuar më herët pronësinë e pajisjes, Dimitrelos mbetet i vetmi person i njohur që ka përdorur pikërisht softuerin "Oxygen Forensics" për këtë qëllim. Ai pretendoi se falë këtij programi arriti të rikuperonte shumë më tepër dokumente të fshira sesa çdo analizë tjetër paraprake. Sipas aktivistëve rusë dhe një ish-punonjësi të kompanisë që ka dëshmuar si sinjalizues para qeverisë amerikane, versioni i softuerit që përdoret në SHBA është plotësisht identik me atë që qarkullon në Rusi. Në fakt, bëhet fjalë për të njëjtin program që kjo kompani – e cila në Rusi operon me emrin "MKO-Systems" – ua ofron Shërbimit Federal të Sigurisë ruse (FSB) dhe agjencive të tjera qeveritare atje.