Operacion shpëtimi i suksesshëm: Minatorët e bllokuar në Trepçë kthehen shëndoshë e mirë në sipërfaqe

Të gjithë minatorët që kishin mbetur të ngujuar gjatë natës në minierën e Trepçës tashmë janë nxjerrë në sipërfaqe dhe gëzojnë shëndet të plotë. Lajmin për gjendjen e tyre e ka konfirmuar për portalin tonë drejtori i ndërmarrjes, Shyqyri Sadiku, i cili ka bërë të ditur se procesi i evakuimit ka përfunduar me sukses. Ngjarja dramatike kishte ndodhur mbrëmjen e së mërkurës, kur 63 minatorë mbetën të bllokuar në horizontet e minierës në Stantërg. Shkak për këtë situatë u bë një avari teknike në sistemin e furnizimit me energji elektrike, e cila ndodhi rreth orës 19:30. Sipas informacioneve zyrtare, defekti erdhi si pasojë e djegies së linjave të tensionit të lartë dhe problemeve në trafostacionin e tunelit të parë, duke ndërprerë punën dhe duke pamundësuar daljen e rregullt të punonjësve. Për t'iu shmangur rrezikut, një pjesë e minatorëve kishin nisur evakuimin përmes daljeve alternative, deri në nxjerrjen e plotë të tyre nga nëntoka.