28 vite pa komandantin 'Sandokan': Rrugëtimi heroik i Abedin Rexhës për lirinë e Kosovës

Sot shënohen 28 vjet nga rënia heroike e Abedin Rexhës, luftëtarit të orëve të para të Ushtrisë Çlirimtare të Kosovës, i cili për shkak të guximit të tij të pashoq u pagëzua nga bashkëluftëtarët me emrin e koduar "Sandokan". I lindur më 8 korrik 1969 në fshatin Vajnik të Skenderajt, Rexha ndoqi një rrugëtim arsimor në Turiçec, Skenderaj dhe më pas në Fakultetin Xehetar-Metalurgjik në Mitrovicë, ku edhe filloi angazhimin e tij ilegal kundër regjimit serb në bashkëpunim me Jakup Nurën e Nuhi Gecin. I ndjekur nga forcat pushtuese për shkak të veprimtarisë së tij atdhetare, Abedini detyrohet të marrë rrugën e mërgimit në vitin 1992. Ai rikthehet në atdhe në vjeshtën e vitit 1996, duke mbajtur kontakte të vazhdueshme me komandantin Adem Jashari. Në maj të vitit 1997, ai ishte pjesë e një grupi të njohur luftëtarësh, përfshirë Fehmi e Xhevë Lladrovcin, Luan Haradinajn dhe Ilaz Kodrën, në një përpjekje për të depërtuar në Kosovë përmes Alpeve Shqiptare, aksion ky që u përball me një pritë të forcave serbe ku ra heroikisht Luan Haradinaj. Pas disa muajsh, në korrik 1997, "Sandokani" së bashku me bashkëluftëtarë si Adrian Krasniqi, Ilaz Kodra e Ilir Konushevci, ia doli të depërtonte në vend, duke intensifikuar punën për konsolidimin e radhëve të UÇK-së. Në nëntor të po atij viti, ai u përball direkt me forcat policore serbe që kishin mësymë Vajnikun për ta arrestuar, duke u shkaktuar humbje të konsiderueshme forcave armike gjatë një përleshjeje të ashpër ku mbeti i plagosur edhe 11-vjeçari Baki Krasniqi. Angazhimi i tij vazhdoi me plane strategjike të koordinuara me Adem Jasharin, siç ishte prita e organizuar në Klisyrë të Rezallës së Re. Kjo periudhë tensioni kulmoi me rënien e mësuesit Halit Geci, vdekja e të cilit shërbeu si moment kthese; më 28 nëntor 1997, në varrimin e tij, Mujë Krasniqi, Rexhep Selimi dhe Daut Haradinaj u shfaqën publikisht me uniformat e UÇK-së, duke i dhënë hov zyrtar luftës çlirimtare. Gjatë vitit 1998, Abedin Rexha u shqua si një strateg i vërtetë, duke u emëruar në gusht të atij viti si komandant i Brigadës 112 "Arben Haliti" në Zonën Operative të Drenicës. Përballë ofensivave të egra serbe që po shkatërronin gjithçka, ai luftoi pa ndalur deri në tetor të vitit 1998. Më 8 tetor 1998, komandant "Sandokani" ra dëshmor në pyjet e Kllodernicës së Skenderajt, duke lënë pas një emër të skalitur në historinë e lavdishme të vendit, si dhe bashkëshorten me dy fëmijët e tij, Sokolin dhe vajzën.