Arsenal synon 'bombën' e janarit: Përgatitet oferta rekord për Julian Alvarezin

Arsenali po planifikon një rikthim të fuqishëm në tregun e transferimeve, me objektiv kryesor sulmuesin argjentinas Julian Alvarez. Lojtari thuhet se po shqyrton seriozisht mundësinë e largimit nga Atletico Madridi gjatë afatit kalimtar të janarit, për shkak të pakënaqësisë me statusin e tij aktual në kryeqytetin spanjoll. Burime pranë klubit londinez bëjnë të ditur se 26-vjeçari tashmë është shumë më i prirur për t'iu bashkuar skuadrës së Mikel Artetës. Kujtojmë se gjatë verës, prioriteti i Alvarezit ishte transferimi te Barcelona, mirëpo kjo lëvizje u pengua nga drejtuesit e Atleticos. Londinezët nuk e kanë fshehur asnjëherë admirimin për lojtarin, pasi edhe më herët kishin shprehur gatishmërinë të shpenzonin mbi 100 milionë euro për shërbimet e tij. Strategjia e Arsenalit për janarin mund të përfshijë edhe shkëmbimin e lojtarëve, ku përfliten emra si Viktor Gyokeres, Ethan Nwaneri apo Noni Madueke si pjesë e mundshme e marrëveshjes. Situata kontraktuale e sulmuesit është mjaft komplekse, duke qenë se ai është i lidhur me Atletico Madridin deri në vitin 2030. Klubi spanjoll njihet për qëndrimin e tij të palëkundur, duke pasur parasysh se gjatë merkatos së kaluar refuzuan një ofertë marramendëse prej 150 milionë eurosh që vinte nga Real Madridi. Ditët në vijim pritet të jenë vendimtare për të kuptuar nëse Arsenali do ta formalizojë këtë interesim dhe nëse argjentinasi do të kërkojë përfundimisht ndarjen nga madrilenët për të nisur një aventurë të re në Premier League.