Drita ndalet nga Olympiakosi në Strumicë, fokusi tashmë te dueli me CSKA-në

Volejbollistet e Dritës nuk kanë arritur të gjejnë forcën për t'iu kundërvënë fuqishëm gjigantit grek, Olympiakos, në përballjen e vlefshme për BVA Cup 2026. Pavarësisht përpjekjeve për të marrë të paktën një set, ekipi gjilanas u mposht me rezultat të pastër 3:0 në sete (25:18, 25:14, 25:20). Në këtë sfidë të zhvilluar në Strumicë të Maqedonisë së Veriut, vashat e drejtuara nga trajneri Lorik Ilazi treguan angazhim maksimal në parket, duke luftuar për çdo top, por përvoja dhe cilësia e kundërshtarit bënë diferencën në momente kyçe të lojës. Pas këtij takimi, bilanci i Dritës në këtë turne ndërkombëtar mbetet me një fitore dhe një humbje. Skuadra kosovare tashmë ka kthyer vëmendjen nga ndeshja e radhës, ku do të përballet me ekipin bullgar të CSKA-së. Ky duel vendimtar është planifikuar të zhvillohet nesër, me fillim nga ora 11:00.