Drama në Trepçë: Defekti elektrik ngujon minatorët në Stantërg, njëri prej tyre ka nevojë për ndihmë

Një defekt serioz në sistemin e energjisë elektrike ka lënë të ngujuar një grup minatorësh në horizontet e minierës së Stantërgut. Lajmin e ka konfirmuar kryetari i Sindikatës së Minatorëve të Trepçës, Ibrahim Januzi, i cili shpjegoi se incidenti ka ndodhur rreth orës 19:30, si pasojë e djegies së linjave të tensionit të lartë dhe problemeve teknike në trafostacionin e tunelit të parë. Sipas informacioneve të fundit, operacioni i nxjerrjes së minatorëve ka filluar përmes daljeve alternative. Januzi bëri të ditur se njëri prej minatorëve tashmë ka dalë në sipërfaqe, ndërsa po punohet intensivisht që edhe pjesa tjetër e grupeve të largohet nga miniera në mënyrë të sigurt. Ai ka theksuar se komunikimi me punëtorët po mbahet përmes linjës telefonike me tela induktivë. Sa i përket gjendjes shëndetësore, kreu i sindikatës njoftoi se minatorët janë në gjendje stabile, megjithatë ka raportuar një problematikë specifike. Njëri nga minatorët ka pësuar një lëndim në këmbë, gjë që po e vështirëson procesin e evakuimit të tij në këmbë nga thellësia e minierës. Lidhur me ndërhyrjen teknike, Januzi sqaroi se defektet në zonën e flotacionit nuk ndikojnë në funksionimin e ashensorit, i cili është çelësi për transportimin e punëtorëve në sipërfaqe. Sipas menaxhmentit, dëmet në rrjetin furnizues nuk janë të përmasave të mëdha, çka lë hapësirë për riparim të shpejtë. Megjithatë, ky incident ka shërbyer si një kambanë alarmi për gjendjen e rëndë të infrastrukturës në Trepçë. Januzi ka shprehur kritika të ashpra ndaj neglizhencës ndaj investimeve, duke vënë në pah se pajisjet e stërvjetëruara dhe mungesa e një linje alternative të furnizimit me energji elektrike po rrezikojnë vazhdimisht jetën e minatorëve, duke shkaktuar ngujime të shpeshta dhe të panevojshme.