Erling Haaland e sheh Barcelonën si destinacionin ideal në rast largimi nga Manchester City

E ardhmja e Erling Haalandit vazhdon të jetë një prej temave më të nxehta të merkatos ndërkombëtare, veçanërisht nëse dinamikat aktuale te Manchester City do të çonin në një ndarje mes palëve. Sipas informacioneve të fundit, sulmuesi 26-vjeçar norvegjez e ka identifikuar Barcelonën si destinacionin e tij të preferuar nëse vendos ta mbyllë aventurën me “Qytetarët”. Lojtari thuhet se është mjaft i joshur nga ideja për të provuar veten në kampionatin spanjoll, La Liga. Megjithatë, gara për shërbimet e tij mbetet mjaft e fortë. Real Madridi vazhdon të qëndrojë në vëzhgim të situatës, ndërsa edhe Arsenali ka shfaqur interesim serioz për të monitoruar çdo zhvillim të mundshëm rreth yllit norvegjez. Burime të afërta me çështjen bëjnë me dije se përfaqësuesit e Real Madridit dhe ata të Arsenalit kanë nisur tashmë kontaktet e para me ekipin e Haalandit, me synimin për të kuptuar ambiciet dhe planet e tij për të ardhmen. Në anën tjetër, Barcelona qëndron në gatishmëri të plotë për të hyrë fuqishëm në negociata, sapo të konfirmohet dëshira e sulmuesit për t’u larguar nga stadiumi “Etihad”. Aktualisht, katalunasit duket se gëzojnë përparësi në preferencat e futbollistit, duke lënë pas rivalët si Arsenali dhe Real Madridi në garën për firmën e tij.