Operacion kërkimi në Munih: Dyshohet për praninë e një pume pranë aeroportit

Një operacion masiv policor është vënë në lëvizje në afërsi të Aeroportit të Munihut, pas raportimeve për shfaqjen e një kafshe të egër, e cila dyshohet të jetë një pumë. Autoritetet gjermane kanë angazhuar mjete të avancuara, përfshirë helikopterë dhe dronë, në përpjekje për të lokalizuar gjitarin e rrallë, megjithatë kërkimet e deritanishme nuk kanë sjellë ndonjë rezultat konkret. Alarmi u ngrit mbrëmjen e së martës, kur një gjahtar, i pajisur me optikë për shikim natën, vërejti një krijesë të pazakontë në rezervatin natyror Notzingermoos, që ndodhet në komunën Oberding të Bavarisë së Sipërme. Pas analizimit të pamjeve të siguruara, një ekspert i fushës ka hedhur dyshime të forta se bëhet fjalë për një pumë. Derisa origjina e kafshës mbetet ende një mister, policia ka bërë thirrje për vigjilencë të shtuar nga ana e qytetarëve. Autoritetet e distriktit kanë kërkuar nga banorët që të raportojnë menjëherë nëse shohin kafshën ose nëse disponojnë informacion mbi vendndodhjen e saj. Si masë paraprake sigurie, banorët e zonës janë këshilluar që të shmangin lëvizjet e pambikëqyrura të fëmijëve jashtë shtëpisë dhe t'i mbajnë kafshët shtëpiake, veçanërisht qentë, të lidhur në zinxhir. Vlen të theksohet se, në të kaluarën, raportime të ngjashme për kafshë të egra në Gjermani kanë rezultuar të jenë alarme të rreme.