Vlerësimi i kushtetutshmërisë, çelësi për të kuptuar ndikimin e Ligjit për Dhomat e Specializuara

Ndjekja e ndryshimeve dhe plotësimeve në Ligjin për Dhomat e Specializuara të Kosovës ka vënë në qendër të vëmendjes debatin rreth pasojave juridike dhe domosdoshmërisë së shqyrtimit të tij kushtetues, çështje për të cilat janë prononcuar juristët Asdren Bytyqi dhe Adrian Ibrahimi. I ftuar në emisionin FIVE, avokati Asdren Bytyqi ka theksuar se ndikimi i vërtetë dhe final i këtyre ndryshimeve ligjore do të mund të matet vetëm pasi Gjykata të japë fjalën e saj për përputhshmërinë me Kushtetutën. “Efekti i saj përfundimtar vihet në pah pas vlerësimit të kushtetutshmërisë së saj. Çdo efekt i mëparshëm, rrjedhimisht çdo gjykim mbi efektin e mëparshëm, është i parakohshëm”, është shprehur Bytyqi gjatë prononcimit të tij. Në të njëjtën linjë, avokati Adrian Ibrahimi ka vendosur theksin te ruajtja e reputacionit të shtetit të Kosovës në rrafshin ndërkombëtar pas këtij vendimi legjislativ. “Shumë është me rëndësi mos me u dëmtu imazhi i Kosovës në arenën ndërkombëtare. Shpresojmë që ky veprim, ose ky projektligj që është miratuar dje, të mos kuptohet në konotacion negativ, por të kuptohet si një kërkesë për zbatimin e të drejtës në mënyrë të plotë, të barabartë dhe objektive nga Dhomat e Specializuara”, ka deklaruar Ibrahimi. Gjatë diskutimit, ai ka sjellë në vëmendje faktin se themelimi i kësaj gjykate ka ardhur si rezultat i vullnetit të lirë dhe vetëdijes së vetë institucioneve të Kosovës, duke kërkuar një qasje të drejtë dhe paanshmëri në procese. “Dhomat e Specializuara janë krijuar me vetëdije edhe me vullnet nga shteti i Kosovës”, ka përfunduar Ibrahimi.